Z staan vir Snork (Toeka-Tokkel se April-uitdaging > my alfabet van dankbaarheid)

Ses en twintig letters, 26 blog-inskrywings oor 26 redes tot dankbaarheid.

Die uwe is taamlik uitgeput.

Nou gaan ek ‘n rukkie lank hier op die blogs zzzzzzzzzzzzzzzzzzzzz

Y staan vir Ylings (Toeka-Tokkel se April-uitdaging > my alfabet van dankbaarheid)

Die HAT verklaar ylings so: Vinnig, snel, in groot haas, bv. Ylings om hulp kom vra. Die woordverklaarders bestempel dit as “deftig”. Hoe graag ek ook al sou wou, sal ek dit seker nooit in ‘n gesprek gebruik nie. Dit keer my egter nie om myself oor die woord te verkneukel nie – oeps, wag…

Die HAT verklaar verkneukel so: Stilletjies lekkerkry oor iets. Hierdie ene het ek wel op fb gebruik, tot my slim seun se verkneukeling.

Ek is dankbaar oor woorde en die mense wat woordeboeke maak. Nou gaan ek ylings tee maak.

X staan vir Soentjie (Toeka-Tokkel se April-uitdaging > my alfabet van dankbaarheid)

W staan vir Willewragtig (Toeka-Tokkel se April-uitdaging > my alfabet van dankbaarheid)

My ouers het my laat begaan. Ek het boomgeklim, in heinings weggekruip, met karretjies in die modder gespeel. Ek was ʼn willewragtig en ek was gelukkig.

 

 

V staan vir Vriendskap (Toeka-Tokkel se April-uitdaging > my alfabet van dankbaarheid)

Vriendskap is een van die grootste seëninge in my lewe.

ʼn Leeftyd gelede het ek hierdie gedig met ʼn kosbare vriendin gedeel.

Verlede jaar het sy dit tussen ou dokumente ontdek en dit op Facebook aan my opgedra.

Old Friendship – Eunice Tietjens

Beautiful and rich is an old friendship,

Grateful to the touch as ancient ivory,

Smooth as aged wine, or sheen of tapestry

Where light has lingered, intimate and long.

Full of tears and warm is an old friendship

That asks no longer deeds of gallantry,

Or any deed at all – save that the friend shall be

Alive and breathing somewhere, like a song.

 

U staan vir Uil (Toeka-Tokkel se April-uitdaging > my alfabet van dankbaarheid)

Onheilsbode op die nok van ʼn dak

Jagter wat geruisloos op sy prooi afduik

Nagmerrie-element in DJ Opperman se gedig Spermutasie:

Ondersoek uit skeure en bouvalle

– soos argeoloë ou ashope –

die saamgekoekte hare

en klein kakebene

in uilballe.

Kenmerkende silhoeët op kinderklere en babakombersies

Gewilde leermeester van kleuters deur klanknabootsing:

Hoe maak ʼn uil? Hoe-hoe!

T staan vir Tee (Toeka-Tokkel se April-uitdaging > my alfabet van dankbaarheid)

In die dae van my jonkheid was dit die toppunt van sofistikasie om te rook. Toe my karakter in ʼn verhoogproduksie ʼn sigaret moes aansteek, was my doppie geklink. (Ja, ons het orals gerook! In vliegtuie, busse, treine, op kantoor, by die huis, in die flieks en op die verhoog.) Dit was nie lank nie, toe koop ek my eie pakkie sigarette: so ʼn stylvolle goue pakkie waarvan die dekseltjie heeltemal oopgeslaan het. Op ʼn stadium was my verbruik 19,5 sigarette per dag (statisties gesproke, dis nou nie asof ek elke dag ʼn halwe sigaret doodgedruk en vir môre gebêre het nie).

Lank voor die drakoniese maatreëls waarmee die arme twakverslaafdes deesdae te kampe het, het ek egter besef dit kon nie so aangaan nie. Dit het my tien jaar gevat om die gewoonte finaal af te sweer. Dit was soos ʼn liefdesteleurstelling: eers dink jy dag en nag aan jou verlore geliefde, later besef jy skielik: “Haai – ek het gister laas aan … gedink” en nog later gaan daar ʼn week/maand/jaar sonder verlange verby. Tog geniet ek dit vandag nog om skelmpies diep in te asem as ek verby ʼn rookarea loop.

Sonder die wonderlike troos van ʼn koppie tee sou ek dit nooit reggekry het om op te hou rook nie. Ja, ek het een verslawing vir ʼn ander verruil, maar hierdie een is ten minste sosiaal aanvaarbaar.

S staan vir See (Toeka-Tokkel se April-uitdaging > my alfabet van dankbaarheid)

Hester se inskrywing oor skulpe het my dilemma opgelos – natuurlik: S staan vir See!

Die lou-soet geur van duineplante terwyl my voete deur die growwe geel seesand van die Natalse Suidkus grawe.

Tsitsikamma se onrustige pluime water soos die golwe teen die rotse slaan.

Ifafa se rotspoeletjies, Astonbaai se duine, Bettiesbaai se seebamboese, Clifton se ronde rotse, Bloubergstrand se Tafelberg-vergesig, Lambertsbaai se snaterende seevoëls, St Lucia se denneboomstrand…

Toe ek op ʼn steil houttrappie hoog bokant ʼn klein strandjie by Brenton-on-Sea sit en uitkyk oor die deinende waters, was ek so dankbaar dat die Skepper vir sy skepsels sulke wonderlike speelplekke gemaak het.

R staan vir Reënboog (Toeka-Tokkel se April-uitdaging > my alfabet van dankbaarheid)

Vir my is ‘n reënboog elke keer ‘n wonderwerk.

Reënboë laat my dink aan my kind.

Reënboë laat my dink aan God.

Genesis 9:16 Die reënboog sal in die wolke wees, en wanneer Ek dit sien, sal Ek dink aan die ewige verbond tussen My en al die lewende wesens op die aarde.

Q staan vir Quidditch (Toeka-Tokkel se April-uitdaging > my alfabet van dankbaarheid)

Quidditch is die sportsoort waarin Harry Potter op Hogwarts uitblink. Hoe kan mens dankbaar wees oor ‘n fiktiewe sport? Ag nouja, vanweë die skaarste aan q-woorde kul ek so ‘n bietjie: ek’s eintlik dankbaar oor fantasie-fiksie – veral oor JK Rowling, Terry Pratchett, TH White, JRR Tolkien en CS Lewis – maar die letter f is laankal afgehandel…