Mense in Suid-Afrika hou hulle reënmeters fyn dop en kan vir jou tot op die naaste millimeter vertel hoeveel reën daar geval het. Hier in die suidoostelike VSA sal die petieterige reënmeters van SA deur ‘n enkele reënbui oorstroom word – trouens, my reënmeter is die omgekeerde deksel van klein Josie se sandput! Na ‘n nag se reën is hy so vol dat dit ‘n stryd is om hom om te keer sodat die oorvloedige water kan uitloop.
Die reën begin onverwags val – as mens weer sien, is die hele wereld nat. Soms is daar ‘n sterk wind – ander kere onderlangse donderweer, maar nooit die drama van ‘n Afrika-donderstorm nie. Gisternag was dit weer sulke tyd. Ek onthou hoe my skoonseun homself – en vir my – met ‘n ou kinderrympie getroos het tydens ‘n lang reënerige week ‘n paar jaar gelede: “April showers bring May flowers.”
Ek verstom my aan al die water en wens dat ek daarvan kon aanstuur na droë streke. Die grond hier is kleierig en as die water ‘n versperring soos die randstene in my kinders se tuin teëkom, lê dit in diep poele totdat ‘n steen weggerol word sodat die water die loop kan neem. Orals loop blink tydelike stroompies teen die afdraande na die sloot hier onder waar die singel sy draai vat. More gaan die paddatjies weer daar sing soos besetenes.
Tannie Frannie 
Dis regtig jammer dat mens nie ‘n lang pyp kan uitstuur om daardie baie “ekstra” water SA toe te stuur nie. Hier in die winter met die baie reën is alles deurdrenk en nat sodat daar somme permanente damme water is. Beeste en skape kry vrotpootjie van nattigheid.
Die baie reen dra by tot die mooi “poskaart”, soos Kameel dit noem, waarin jy woon.
Die poskaart is op oomblik ekstra droog. Droogste in 30 jaar, selfde met hitte ook. Natuurverskuiwing is sleg.
Sjoe, dis erg…
Is Josh een van daai paddatjies?
Nee, Vuurklip – Josh sing wel soos ‘n besetene, maar meer soos ‘n besete engel.
Dit klink heerlik, Frannie, al daardie water!🤗
Dit is omtrent ‘n ervaring vir iemand wat aan droogte gewoond is.
Dit klink soos n wolkbreuk!
Dis ‘n goeie beskrywing van die reen hierso.
Voor die winter hier kom vra ek amper elke dag “Let it rain, let it rain”! Dit is so baie droog hier.
Daardie smagting is in ons Suid-Afrikaners ingebore.
Reën! Hierdie boeredogter se hart sing sommer net by die gedagte daaraan.
Ja Toortsie – en selfs ons stadsmense juig as dit reen in SA.
Vind asb n manier!! Ons verdroog soos kaiings hier😱
En hier kry ons n paar minute terug 40mm in 10 minute! Karre dryf alweer in die beroemde Rachel de Beer duikweg!!😬😬
Eish, aitog…
Reën…..🙏🏻
Iets waaraan jou omwêreld ook ‘n skaarste het…
Dis interessant hoe die weer patrone verskil – nie net van land tot land nie, maar ook van streek tot streek in dieselfde land. Aan die Weskus ken ons nie sommer voortdurende reën in die somer nie, maar hier aan die suidoostelike kus is dit ‘n gegewe … ek sukkel nog om gewoond te raak dat dit nie noodwendig koud is wanneer dit reën nie!
Dit was vir my altyd wonderlik in Bali as daai reën ewe skielik begin uitsak in watermassa. Die heerlikste was dat die reën warm was. In teenstelling van toe ek in Kanada was, waar die reën ysblokkie koud is. Ons Suid-Afrikaners smag maar altyd na reën.