Tee

Vandag se blog-por is “Tea”. Omdat die uwe verslaaf is aan tee en ook aan blog-skryf, gehoorsaam sy summier. Ook om vir julle te laat weet dat dit wonderlik is om weer by julle almal te kan lees en te hoor hoe dit gaan – ons is nou weer op ‘n plek met wifi.

Ek hou van die Amerikaners. Hulle is vriendelike, hartlike mense, wat weet hoe om verjaarsdae en herdenkings en seisoene behoorlik te vier. Ek verstaan hulle taal (meestal) en verduidelik graag my aksent, wat orals opgemerk word. Dis lekker om in ‘n wêreld rond te beweeg waarin daar bekende elemente is, wat tog nie heeltemal bekend is nie.

So neem my dogter my en haar vriendin H na Camellia’s Sin Tea Parlor, ‘n bekoorlike teekamer in ‘n geskiedkundige ou dorp/amper stad Carlisle, hier in Pennsylvania. Hulle verduidelik hulle naam so:

Camellia sinensis is the botanical name for the tea plant; hence Camellia’s “Sin” (Did you know that all of the tea you drink comes from this one plant?)

Die voordeur van die geskiedkundige geboutjie sit vlak op die straat.

Met die geskenkwinkeltjie links, stap mens deur ‘n gang wat uitmond in die wonderlikste spasie, ‘n groot ou eetkamer met ‘n yslike bow window en fraai gedekte tafels: fyn porselein, sierlike teepotte, mooi tafeldoeke en bypassende lapservette.

Daar is ‘n muurkas met nog teepotte en koppies; ‘n rak vol hoede waaruit mens een kan kies om te dra terwyl jy teedrink, as jy sou wou; die mooiste muurversierings.

Hier drink mens tee soos mens elders wyn drink: die een na die ander koppie saam met die vasgestelde spyskaart: sop, slaai, skons (sout en soet) en les bes, ‘n dubbelverdieping-koekbord met soet en sout happies. Dis ‘n eienaardige volgorde, maar dit werk goed en die porsies is (dankietog!) mooi klein en fyn, nie so skrikwekkend groot soos wat dit gewoonlik in die VSA is nie. (Ek onthou nou nog my skok toe ‘n “medium” Starbucks-koffie aan my oorhandig is…)

‘n Mens mag agtereenvolgens drie teepotte vol kies uit die oorstelpende verskeidenheid geure, op voorwaarde dat jy elke teepot eers leegdrink – We don’t like wasting tea! Ons het die volgende geure kafgedraf:

Snowflake – a black tea with coconut, almond and cinnamon; Pineapple upside down cake – a black tea with pineapple and cherry bits with caramel flavor; Fairy dust – a black tea blended with vanilla, spices and botanicals.

Ek het die tee swart gedrink, met een suikerblokkie in elke koppie, netjies deur ‘n suikertangetjie vasgeknyp en afgelewer. Diep asemteue het my laat besef dat die tipies Amerikaanse oordaad van gemengde geure (niks hier het net één geur nie!) tóg kan werk. Moet egter erken dat ek nie meer reg aan die Fairy dust kon laat geskied nie…

My liewe dogter noem hierdie uitstappie met reg ‘n viering van vrou-wees. Waar sou ons wees sonder tee?

 

Vriendskap

In ʹn geselskap raak sy tjoepstil. Sy’s ʹn selferkende introvert, maar onder die (letterlik) niksseggende dop woed daar ʹn wonderlike ryk verbeeldingslewe en ʹn intense lewensvreugde. Om met haar deur ʹn Amerikaanse “store” te slenter, is om die Amerikaanse belewenis opnuut te ervaar. Sy haak vas by ʹn rak sonbrille en vis ʹn raam met “stars ʹn stripes” uit vir ʹn selfie. Sy rangskik ʹn ry patriotiese coke-blikkies sodat die Amerikaanse vlaggies in gelid oplyn en kiek hulle dan. Sy ontdek “pop tarts” en graankos met pikkewyne (?) op die houer. Hierdie kosbare universiteitsvriendin van my dogter het vir een week in die VSA kom kuier om my kind te ondersteun na haar ernstige operasie. Sy is gister weer terug Suid-Afrika toe en ons weet sy het veilig daar aangekom. Ons en Daisy die hond verlang verskriklik na haar.

Na agt dae in die hospitaal, waartydens ek en haar man soos zombies in verskeie hospitaalkamers gesit het, is my kind ontslaan. Sy herstel stadig maar seker. Terwyl haar vriendin hier was, het ons elke dag op ʹn uitstappie gegaan, want H is ʹn wêreldreisiger met ʹn internasionale bestuurslisensie, anders as die uwe wat te skrikkerig is om aan die regterkant van die pad te gaan staan en ry. Die ekskursies was wonderlike medisyne, net die regte ding om V aan die gang te kry en haar weer aan die wêreld daarbuite gewoond te maak.

My hart is tot barstens toe vol dankbaarheid oor goeie mediese sorg, ʹn staatmaker-skoonseun, ʹn dapper dogter, ʹn dierbare vriendin en ʹn genadige Vader.