2016 Waar lees jy lekker? Tannie Frannie se keuse

Dankie aan Hester vir die benoeming en aan Toortsie vir die idee.

Hierdie is ‘n blogspeletjie wat ten doel het om ons blogs, verkieslike Afrikaanse blogs, ‘n bietjie blootstelling te gee.

Hoe dit werk:

1. Dis totaal vrywillig. Jy hoef net deel te neem as jy regtig wil.
2. Dit sal baie lekker wees as jy deelneem.
3. Word jy benoem? Hartlik geluk! Dit beteken iemand lees graag by jou!
4. Noem jou bloginskrywing: 2016 Waar lees jy lekker? (jou naam) se keuse.
5. Bedank die persoon wat jou benoem het en tag die bloginskrywing waarin jy benoem is. (Omdat soveel mense vra: Kliek op bloginskrywing se opskrif, kleur die URL in, regskliek, copy; Dan in jou beheerpaneel waar jy die bloginskrywing skryf, kleur die woord in wat verwys na die persoon wat jou benoem het, regskliek en paste.)
6. Herhaal die eerste sin in hierdie bloginskrywing, asook die reëls, sodat die volgende persoon ook weet waaroor dit gaan.
7. Benoem 3 tot 5 bloggers/blogs waar jy graag lees en sê ook hoekom jy graag daar lees. Onthou om elkeen op dieselfde manier te tag. Kliek op ‘n bloginskrywing, kleur URL in …
8. Jy mag iemand benoem wat alreeds benoem is, maar veral nuwe name is ook altyd welkom.

Vyf (nee, ses, nee, sewe!) bloggers wat nog nie genoem is nie:

poerdezmerdez.wordpress.com vir haar droë sin vir humor

perdebytjie.wordpress.com vir haar liefde vir Afrika-landskappe en haar wonderlike foto’s daarvan

neteknogsteeds.wordpress.com vir haar menswees en die interessante kunsgrepe wat sy met ons deel

newsferret.wordpress.com vir sy sagte oog op mense en honde en die manier waarop hy ons ‘n aangename dag of ‘n gawe naweek toewens

scrapydo2.wordpress.com vir haar menslikheid en die interessante detail oor Nieu-Seeland

binnekantoe.wordpress.com vir haar keurige taalgebruik en fyn lewensfilosofie

dewetswild.com vir die wonderlike kennis oor die natuur wat hy met ons deel en die harde werk wat in sy reisblog ingaan

En (‘skuus, Lou) as julle gedink het ek kroek met sewe in plaas van vyf nuwe name – kyk wat vang ek nou aan:

Dit kan nie anders nie – ek moet eenvoudig die volgende bloggers ook noem, al is daar reeds elders na hulle verwys: Tina van Rondomtaliedraai, Toortsie en Kameel, en Hester van Dis Ekke.

Die heeltyd kom daar nog name by my op: Monica van McGregor se dinge, Dalene van Dans met elektroniese ink – maar my mentor het gesê mens moet weet wanneer om ‘n streep te trek…

 

 

Die dag toe Mickey Mouse ‘n draai by die doopvont gemaak het

ʼn Doopsondag roer altyd hierdie ouma se hartsnare: die ernstige formulier, die gespanne ouers, die formele uitspreek van die kindjie se naam, die pragtige ou babatjies. Gelukkig is daar altyd ʼn komiese element ook, wat my help om nie sommer in die onbeholpe sensitiwiteit van die ouderdom in trane uit te bars net omdat die hele seremonie vir my so vreeslik mooi is nie.

Vandag was weer so. Die babadogtertjies is opgetooi met die fraaiste kopbandjies (ʼn mode wat sekerlik vir predikante moet laat voel asof hulle aan ʼn hinderniswedren deelneem, maar watwou – hulle navigeer die struikelblokkies heel behendig). Met sy “sense of occasion” en lieflike deernis doop ons predikant vyf kleintjies. Die jongste babatjie skrik toe hy die koue druppels water op sy voorkoppie voel. Die peutertjie sit doodstil en wys met sy mollige voorvingertjie na die water – ʼn omgekeerde weerspieëling van die tafereel tussen God en Adam in die Sistynse Kapel. Ná die druppels water is daar ʼn effense pouse, terwyl die predikant sy hand in seën oor die klein voorkoppie uitgestrek hou. Nie een baba huil nie en ek is namens die ouers dankbaar, al het  ons geliefde voormalige herder wat verlede jaar oorlede is, gesê dis die kindertjies se manier om die Here te prys.

Die gesin wat my hart gesteel het, het skuins voor my gesit. Toe die ouers voor moet gaan staan, weet Boetie (ek skat hom so twee jaar oud) nie mooi wat om nou te doen nie. Hy gryp sy yslike opgestopte Mickey Mouse en gaan staan in reddelose stilte in die middel van die gang totdat sy pappa terugdraai, hom kom optel en saamvat vorentoe. Alle eer aan daardie pa! Dis nie enigeen wat ʼn doopseremonie met grasie kan deurmaak terwyl jy jou ouer kindjie met sy yslike Walt Disney-karakter op jou arm dra nie. En waarom sou Mickey Mouse nie ʼn draai by die doopvont kon maak nie? Hy verteenwoordig geslagte-lange positiewe stories en die geleentheid vir derduisende kunstenaars om aan hulle kreatiwiteit uiting te gee. Vanoggend was hy ʼn anker vir ʼn klein seuntjie wat nou sy wêreld met ʼn nuweling moet deel en kon hierdie seuntjie danksy sy pappa se sterk en liefdevolle arm ʼn vriendelike, genadige kerk beleef.