Ons is ‘n groep vroue, bloggers, en tussen ons klompie het ‘n dorp ontstaan, Rebusfontein. Iewers in Suid-Afrika. Iewers in ons lieflike land.
Hierdie hoofstuk sluit by ‘n menigte voriges aan. Jy sal dalk frons, jy sal dalk wonder. Ja, Rebus bestaan. Vir ons, en dalk vir jou.
Rebus is ons wegloop-plek, en soms ons wegkruipplek. Maar feite is, Rebus is ONS s’n.
As jy ooit lus is om deel te word, om deel te neem, sê net, en jou droom sal bewaarheid word.Volg skakel https://fresh.inlinkz.com/party/7978d243e406473ca23727d75a9a2a46 om by die Inlinksblad te kom waar al die stories in hierdie reeks gelys word.
____________________________________________________________________________________________________________________________
Die sewentigerjare van die vorige eeu was Frannie se heyday. Sy het ‘n haarstyl ontdek wat haar skrikwekkende krulle getem en ten beste laat vertoon het. Daar was vriende en partytjies en baie pret met amateurtoneelspelery. Sy het in Pretoria rondgerits met haar rooi Volkswagenkewer en lekker gewoon in die ou Sunnyside-woonstelletjie met die krakende plankvloere.
Nou het die Goue Vroue besluit om partytjie te hou op maat van die klankbaan van Frannie se destydse dae: ABBA se musiek! Frannie gaan skrabbel in haar klerekas in die dakslaapkamer van haar toringhuisie totdat sy dit kry: haar grasgroen crimpolene-broekpak uit die laat-sestigerjare: ‘n lang, moulose baadjie met goue knope en – die vleiendste langbroekstyl ooit, naamlik ‘n klokbroek, oftewel bellbottoms. Sy grawe verder, tot by haar platformsandale, en pluk ook ‘n goue bloesie uit om die nodige partytjiefleur aan haar uitrusting te gee. Sy kyk in die spieël en snak na haar asem toe sy die jeugdige gesig omraam met woeste los bruin krulle sien…
Die aand wat op so ‘n betowerde noot begin, raak net al hoe beter. Die lyndansery was vet pret, al het Frannie met haar lompe houtklompe veroorsaak dat ‘n hele ry Goue Vroue in duie gestort het… Toe ABBA opdaag, het sy die sandale uitgeskop en kaalvoet onder die verhoog gediskodans dat die biesies bewe. Op die hoë noot van “Fernando” het Pierce Brosnan gearriveer.
Toortsie gryp die kareoke-mikrofoon en begin sing: “Voulez-vous…ahah…” terwyl sy flikkers in Pierce se rigting gooi. Dié sit nou in ‘n gemaklike uitskopleunstoel wat Appeltjie vir hom uit iemand se Rebusfonteinhuisie verkry het, met ‘n martini in die hand (shaken, not stirred).
Die volgende Goue Vrou kry ‘n kareoke-kans: dis Appeltjie met “Waterloo”.
Abba – Waterloo – YouTube
Dan kom Seegogga met haar gunsteling: “Super Trouper”. Uiters gepas, want hierdie vrou is ‘n ware trouper, iemand op wie mens kan staatmaak. Aalsie sing die vrolike “Mamma Mia” en Positief volg met “I do I do I do”. Woordnoot en Trommeltjies sing saam “S.O.S.”. San nooi almal: “Take a chance on me” en VirgoC sing “Thank you for the music”.
Scrapy voer “Eagle” uit: “Flying high, high, like a bird in the sky…I’m an eagle that flies on the breeze…” en Christa sing oor “Summer night city”: “Lots to take and lots to give, time to breathe and time to live.”
Agter op die verhoog sit Una en Frannie en stry oor wie “The winner takes it all” gaan sing. F: “Ja, maar jy het gesê jy kan dit nie sing nie want jy gaan verkrummel!” U: “Maar die paartie is so vrolik, ek voel nou sommer weerbaar.” F: “Una, dis mý liedjie daai, my drie-uur-innie-oggend-wysie, die lied met die woorde wat ek netsowel self kon geskryf het!” Die laaste note van “Summer night city” vervaag en Una en Frannie duik tegelyk vir die mikrofoon terwyl Christa maak dat sy vinnig wegkom. Na ‘n kort, hewige toutrekkery besef die twee dat hulle in die kalklig staan en dat die inleiding reeds speel. Una knipoog en Frannie knik haar kop; dan trek die twee saam los met die mees melodramatiese weergawe ooit van “the bleakest break-up song”, soos ‘n ABBA-impresario dit eens genoem het. “I don’t wanna talk about things we’ve gone through. Though it’s hurting me, now it’s history…”
Meryl Streep – The Winner Takes it All (Full Video) MAMMA MIA! – YouTube
Toe die laaste woorde wegsterf, sien Positief dat sy nou skielik iets sal moet doen, anders gaan hierdie partytjie in dronkverdriet verdrink. Sy wink Sonell nader, stop die mikrofoon in haar hand en sis: “Sing, suster, sing!!” terwyl die eerste note van “Dancing Queen” weerklink. Sommer gou is almal weer aan’t danse en lagge, Una en Frannie inkluis.
Intussen besef Toortsie dat Aalsie se chips met ‘n dip lankal verdwyn het, dat Trommeltjies se Vier Nefies reeds heelwat vrolikheid veroorsaak het en dat dit hoog tyd is om te eet. In haar kombuis word die een na die ander lekkerny opgetower terwyl Boetie fluks disse aandra na die tafel langs die verhoog. Hierdie partytjie is nog lank nie verby nie!
VirgoC, sal jy asseblief verder vertel?