Om te ontvang, is vir my heerlik. Toe ons as jong gesin in die Kaap gebly het, het ons presentjies per pos van my mammie en haar susters ontvang – versigtig in skoendose verpak, met die bruinpapier vol seëls geplak – ek het dit “hêppiebokse” genoem. Daarin was handwerkies: gebreide bedkouse en gehekelde truitjies vir die kinders. Daar was soms soetkoekies, vatlappies, ‘n nuwe voorskoot. My mammie het op ‘n keer sakkies met tellers vir ons kinders gemaak: een akker, twee koeldrankdoppies, drie knope, vier klippies, vyf skulpies…
Vandag nog is ek so bevoorreg om partykeer ‘n “hêppiesakkie” van ‘n vriendin te ontvang: ‘n bruinpapiersakkie met ‘n groot pot handeroom (wat my hande al meermale gehelp het om ‘n trek te verduur), ‘n wasgoedpennetjie waarop ‘n strokie mooi lint geplak is (daar is ‘n paar sulke pennetjies wat sakkies in die koskas toehou), ‘n botteltjie van haar eie heerlike mengsel droëvrugte, neute en klapper (dié verdwyn binne ‘n dag of twee), die mooiste handgemaakte kaartjie met ‘n psalmvers…
‘n Ander vriendin gee soms sommer so uit die bloute vir my ‘n boek: “…op voorwaarde dat ek dit ná jou kan lees”. Watter wonderlike geskenk! So stel sy my voor aan nuwe skrywers – dis hoe ek Karin Brynard se werk leer ken het. Sy bied my ook die gemeensaamheid van oor ‘n boek te kan gesels; met mekaar dit wat vir ons hoogtepunte was, te kan deel.
Ek is ook ‘n gretige gas; dis tog baie lekkerder om jouself rustig op te tooi en in iemand anders se eetkamer haar lekker kos te gaan eet as om self voor die stoof te staan! Vir ‘n gasvrou gee ek graag blomme, sjokolade, wyn…
Want dis ook vir my lekker om te gee. Ek’s nie so goed daarmee soos met ontvang nie, maar ek doen my bes. Party mense weet mos sommer instinktief hoe om presies die regte geskenk te kies – ek nié. As die ontvanger tog maar wis hoe ek wroeg: die presentjie is te klein/te groot/te goedkoop/te duur/onbruikbaar/vermetel/oorbodig/onbenullig/”coals to Newcastle”…sou hy/sy so gou moontlik vir my laat weet: “baie dankie, dis perfek/so welkom/net reg”, al was dit nie eers eintlik waar nie…
Om die inskrywings van verskillende bloggers in Lê-Jou-Eier te geniet of om self ‘n eier te kom lê wat ons kan uitbroei en grootmaak, kliek op die volgende InLinkz skakel:
Vir die reëls van hierdie eier-boerdery, om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakel by Dis Ekke.
Nuwe onderwerpe word aangekondig elke Donderdag om 12:00 en sluit outomaties na een week.