In die oomblik – 2021(13)

Joshua (5 jaar oud) speel graag hy’s ‘n hondjie. Dan spring hy van buite teen ouma se deur op, druk die handvatsel af en stoot die deur oop. Handeviervoet kom hy die kamer binne en waai sy stert. Soms is hy ‘n reeds bekende hond, maar meestal is dit ‘n nuwe hond wat nou weer in ouma se kamer beland het. Dan moet hy ‘n plastiekbakkie vars water kry. As ouma (soos gewoonlik) voor die rekenaar sit en ietwat onwillig lyk, verander die hond ‘n rukkie lank in Joshua, totdat hy die bakkie met water vir die hond neergesit het. Dan drink die hond lekker water en spring op die bed om ‘n bietjie te kuier.

In die amper vyf maande wat ouma weer tuis is, was daar al ‘n hele paar honde met ‘n hele paar name, bv. Wagter, Flaffie, Perske, Piesang en Kersie (‘n ou hondjie wat stadig beweeg). Vandag, toe ouma se voorstel van “Vlekkie” nie byval vind nie, het sy ten einde raad die naam “Vrugtesap” vir ‘n nuwe hond voorgestel.

Joshua, kopskuddend:

“’n Hondjie wat se naam is ‘Vrugtesap’ – daai puppies don’t exist.”

 

Nini Bennet. Met apologie — Versindaba

Met apologie Verlede jaar 1 Mei het Nkosazana Dlamini-Zuma aangekondig ons mog tussen 6 en 9 soggens oefen. Na ’n paar weke van strawwe inperking was dit welkome nuus en die strate het gewemel van drawwers en stappers, selfs dié wat nooit voorheen gestap het nie. Die vanselfsprekende was nie meer so vanselfsprekend…

Nini Bennet. Met apologie — Versindaba

NB. Ek is nie tegnologies geletterd nie en weet nie hoe om hierdie skreeusnaakse storie deur Nini Bennet op die gebruiklike manier te herblog nie, maar niemand van my blogvriende moet dit misloop nie!

In die oomblik – 2021(12)

Joshua, my vyfjarige kleinseun, is ‘n ingenieur van formaat. Hy besit ‘n hele klomp waaiers, groot en klein, in verskillende stadia van aftakeling. Wanneer hy vir die hoeveelste keer die ou groot bruin staanwaaier aanmekaarsit, moet ouma die heeltyd kyk: agterste draadskerm; skroef; lem; skroef; voorste draadskerm; dan die toets of die ding nou werk – inprop en aanskakel.

Joshua kan hom verkyk aan Youtube-video’s waarop mense ou waaiers skoon- en heelmaak, terwyl hulle die kyker vertel waarmee hulle besig is (die kommentaar is natuurlik alles in Engels).

Vandag is dit weer sulke tyd en ouma moet kyk, al probeer sy eintlik werk…

Maar ai, hoe bly was ek dat ek aanhou kyk het, want nadat die outjie my ingelig het dat hy nog die “laaste part” moet sê, rond hy ewe plegtig af, handjies formeel teen mekaar geplaas, met:

“And that is hoe ‘n man ‘n waaier fix.”