Toe Afrikaans nog as “ons pêrel van groot waarde” beskou is, is kinders gemaan om dit suiwer te gebruik – g’n Engelse uitdrukkings tussenin nie! Destyds was dit ook maklik, want daar was ‘n ryk Afrikaanse omgewing: puik kinderprogramme op TV, talle Afrikaanse tydskrifte en koerante, Afrikaanse flieks, universiteite waar Afrikaans vanselfsprekend die voertaal was.
As selfaangestelde bewaarder van my moedertaal, het ek probeer om my kleindogtertjie Gabby ook te leer dat mens enigiets in Afrikaans kan sê. Soms het dit gevoel of ek met my hande ‘n oorstroming probeer keer, want sy word in ‘n gans ander taalomgewing groot: Engels op die TV en YouTube, Engels in partytjie-uitnodigings, Amerikaanse superheroes en pop stars. Sy het my egter geduldig verdra – en toe is ek vir 14 maande weg uit haar lewetjie en die Engelse ranke groei welig…
Ouma is terug en vasberade om al daai Engelse woorde in haar oogappeltjie se taalgebruik met mag en mening te beveg. Vandag is die wind egter behoorlik uit my seile gehaal, want dit kom toe uit dat Gabby nog altyd gedink het haar ouma verstaan Engels nie so mooi nie. Want ouma het dan altyd gevra wat die Engelse woord in Afrikaans beteken!
Kleinkinders help oumas om hulself nie so bitterlik ernstig op te neem nie…
Tannie Frannie 
Jip. Die wereld draai en met elke draai val daar iets af!
(Maar daar word darem ook iets opgetel – al kan ons nie altyd sulke optelgoed na waarde skat nie.)
Frannie, dis absoluut kosbaar! Miskien moet jy by my kom aanmeld vir ekstra Engelse klasse…😉😂
Jaaa, gawe plan! Solank daar tee betrokke is, dis die een ding wat die Engelse goed doen 😆
Sug. Tee.
Wat – wil jy wyn hê?
Hoe ken jy my, Frannie, natuurlik.
Is dit nie te kosbaar nie! My sussie se kinders het in ‘n Afrikaanse huis grootgeword, maar in Durban was die skole Engels. Toe het haar klein seuntjie die idee gehad dat kinders Engels praat en grootmense Afrikaans.
Kostelik!
Ek bied aan tee EN wyn 🙂 🙂
Mmm, lekkerrr…
Toe ek klein was het ook geglo grootmense praat grootmenstaal. Nou wonder ek: het hulle dalk Engels gepraat dat ek nie moes verstaan nie?
Miskien moet ons by Una gaan wyn, ag ek bedoel tee drink
Wat van ‘n ou knertsie Frangelico?
Ja natuurlik. Altyd heerlik. Maar ek dog ons is gerehabiliteer?
Oooo jaaa… Agge nee…
Ja dis vreeslik.!
Oooo ek weet waar jy vandaan kom. Hier doen ek ook my bes om Afrikaans bo te hou as ek met Bea praat, maar ai, dis n storie. Alles om haar is dan Engels so waarom Afrikaans. Hier is dit ook dat ons “grootmense”Afrikaans praat. Beste is dat klein madam alles tog verstaan en in Afrikaans kan saampraat.
😀
Toemaar, Ouma. Sy’s baie lief vir jou ten spyte van jou karige begrip van Engels.
😀
Ai, Dries, ek geniet altyd jou meelewende kommentaar so baie!
Skryf ek en jy so oor Afrikaans vandag. Myne word môre-oggend gepubliseer en toe ek kom lees wat my blogmaats skryf, lees ek jou raak. Frannie, ons moet die taal help suiwer hou. Stem saam met jou. Buitendien, die kinders neem Afrikaans as vak op skool, moet die woorde ken.
Frannie, my pa het net so suiwer Afrikaans gepraat, met my boetie geen babataal ens. Hy het alles met my probeer en tot vandag praat ek soos laslappie kombers Afrikaans.
Maar ons weet mos jy is ‘n rebel 😘
Frannie ek het die ding net gister bedink. Ons huisgesin is Afrikaans en Eʼngels. Die een kind praat net Engels met my en Ken, die ander Afrikaans met albei van ons, ons kunskind Afrikaans met my en Engels met Ken. Skoonseun doen dieselfde. Die kleinkinders op die erf praat nog altyd Afrikaans… en ewe skielik het die 16 jarige Engels met sy oupa begin praat. Ek sit verstom en luister want dis lang gesprekke wat hulle voer. Gister kom kuier my vriendin. Sy het Engels grootgeword maar met ‘n Afrikaner getrou. Nou ons 40 jarelange vriendskap was nog altyd Afrikaans. Hier sit sy gister en praat Afrikaans met my en Engels met Ken. Iets wat sy nooit voorheen gedoen het nie. Ek begin werklik nou kopkrap oor al die verandering. Ek gaan nou saam ‘n wyntjie drink.
Jy moet hoor hoe praat klein Joshi Engels!! “Nou you draai dis screwdraaier dis way…” Hierdie onderwerp gaan my tot raserny dryf – of tot ‘n bloginskrywing, of dalk tot albei!
Ek lag lekker vir jou Frannie. Ouma moet maar weer die suiwer Afrikaans inbring dat Joshi kan leer.