In my jeug was ek bevoorreg om ‘n besonderse mentor te hê en soos wat die jeug mos maar maak, het ek hom destyds nie na behore waardeer nie. Hy was professor in die Afrikaanse taalkunde, een van ‘n groep jong intellektueles wat vernuwing in die dissipline gebring het. Sy spesiale belangstelling was die studie van betekenis soos wat dit in taal tot uiting kom. Hy was lief vir mense en vir die wêreld en het elke dag met opgewondenheid, verwondering en kopskuddende verstomming geleef. Sy gunstelingvraag aan my was: “Wat hoor jy en wat sien jy?” Destyds het ek in my verwardheid maar min te antwoord gehad – ‘n leeftyd later en steeds verward, gaan ek tog probeer om te vertel wat ek vandag hoor en sien.
Ek hoor stilte en die suising van my eie bloed. Die wind waai daarbuite, maar mens hoor dit nie, a.g.v. die huis se goeie insulasie. Ek sien helder sonskyn en so nou en dan ‘n motor wat verbyry. Die wêreld gaan sy gang…
My kinders se student home is gister onder kwarantyn geplaas omdat een van die aflospersoneel (die huisouers wat instaan wanneer my kinders af is) positief vir Covid getoets het. Dit beteken dat V&P saam met die vyf seuntjies wat tans in hulle huis is, nou vir twee weke tuis moet bly. Voorwaar ‘n uitdaging, om daardie lotjie 14 dae lank, 24/7, besig en gelukkig te hou – maar ek weet hulle kan dit hanteer.
Voorts beteken dit dat ek en die twee katte nou vir twee weke op ons eie is, hier in V&P se huis. My reis terug Suid-Afrika toe val deur die mat, want ek het net nie genoeg durf om alleen deur die hoepels te probeer spring nie, ek sou dit slegs met die kosbare ondersteuning van my liewe dogter kon reggekry het.
Soos wat ek talle kere hier by motorvensters sit en uitkyk het na die prentjiemooi pophuise langs die pad, met wiegstoele op die stoep en ‘n vlag of ‘n sportembleem of ‘n plakkaat met ‘n sentimentele boodskap, het ek ‘n speletjie met myself gespeel: ek soek na die kleinste huisies en verbeel my dan dat ek in daardie huisie woon, met my besittings rondom my, aangename bure, vriende net om die draai, en ‘n kat om op my skoot te lê. Nouja, soos die Amerikaners sou sê: Here I am, living the dream! (Behalwe dat die huis waar ek woon, nie klein is nie, die besittings nie myne nie, en my vriende baie ver.)
In elk geval is daar geen dringende rede waarom ek nou moet teruggaan nie – behalwe verlange…en dié is maar altyd daar, waar ek ook al is.
En jy, liewe leser? Wat hoor jy en wat sien jy?
Psalm 139:3 − Of ek reis en of ek oorbly, U bepaal dit, U is met al my paaie goed bekend.
pieterriedemann said:
Pragtig verwoord!
Tannie Frannie said:
Hoe waardeer ek jou kompliment!
scrapydo2.wordpress.com said:
Daar is tog n dieper waarde daaraan dat jy nie nou kan huistoe gaan nie. Dis regtig n veilige hawe waarin jy jou nou bevind en dit is ook goed so. Die geleentheid om terug te gaan sal nog kom. Eks jammer om te hoor dat die virus so naby gekom het dat jou kinders nou voltyds met die kindertjies moet wees. Gelukkig is dit soos jy sê: jy is in n huis met sy inhoud al is dit nie joune nie tog is jy veilig daar. Geniet nog jou rustigheid en luister en kyk om jou, dis belangrik.
Tannie Frannie said:
Jy is so ‘n goeie vriendin, Scrapy – baie dankie vir jou raad, ek waardeer dit opreg!
scrapydo2.wordpress.com said:
Groot plesier om jou te ken en vriendin te wees. Ek voel vir jou! Ek het stuk geskryf Woensdag na aanleiding van jou hoor en sien. Hopelik pos ek dit vanaand of anders more wanneer dit hopelik rustiger gaan wees.
Tannie Frannie said:
O lekker, ek sien uit daarna!
scrapydo2.wordpress.com said:
Saterdag het weer verby gegaan sonder dat ek tyd gekry het. Gelukkig is dit klaar geskryf. Moet nou net dit opplak. Het vanmiddag vroë verjaarsdag met Bea gevier.
seegogga said:
Ek hoor die verlange. Ek hoor die stilte se suising in jou ore.Sterkte daar. Doen miskien iets eksoties- soos n aanlyn kurses, of skryf n storie of maak kersversierings. Dis goed dat jy insien dat daar n doel is met alles
Tannie Frannie said:
Dankie, Seegogga, ek maak so ❤
Anne said:
Daar is wel ‘n doel met alles – partykeer erken ons dit eers later. Ek hoor die verlange in jou en in my eie hart wat ‘n kersfees sien sonder kinders en klein kinders. Maar, ek sien ook hoe ons tuin groener word en waardeer die paar blomme wat uitkom. Ek dank die Here vir die bietjie reën en vir die baie voëls wat my siel ‘n bietjie oplig. Sterkte – jy het ‘n rede om langer daar te bly. Ek hoop net dat jou kans om terug te keer nie te lank sal vat nie.
Tannie Frannie said:
Liewe Anne, jy is kosbaar!
Hennie la Grange said:
Wat n teleurstelling moet dit nie wees nie dat jy nie kan “huis toe” kom nie. Uit wat ek van jou gelees het, is jy tuis, sommer baie. lekker tuis. Ag, hierdie is net n effense vertraging, dink so daaraan. En dan, wanneer dit eindelik tog gebeur dat jy terugkeer, sal jy weet waarom die uitstel vir jou op die duur tog goed was. Gryp elke dag.
Tannie Frannie said:
Dankie, dankie vir jou omgee! Ek volg jou goeie raad.
Kameel said:
Jy is in Sy hande en Hy weet die beste. Sela
Tannie Frannie said:
Hier in die wagkamer, nè Kameel…
lizaborstlap said:
Dis so mooi gesê…”behalwe verlange…en dié is maar altyd daar, waar ek ook al is” ~ ek ondervind dit ook deesdae. Hoop jou dae is ekstra spesiaal!
Tannie Frannie said:
Hoe gaan dit met jou? Ek weet daar is ander bloggers wat ook aan jou dink.
lizaborstlap said:
Dit gaan stresvol op hierdie oomblik. Ons oorplanting is herskeduleer vir 4 Desember. Daar is nog toetse hierdie week en Charlotte is siek. Ons het regtig gebed nodig dat die Here ons hierdeur kan kry.
Dankie vir die vra en omgee. Ek waardeer dit so baie.☘☘☘
Tannie Frannie said:
Mag alles met julle goed gaan, mag julle in krag en genade hierdeur gedra word.
woordnoot said:
Ai Frannie….ek hoor baie stemme…elkeen met sy eie pyn. Ek wil weghardloop want as die foon biep is dit iewers n nuwe pyn aankondiging. Maar jou blog inspireer my om nou opsetlik na iets te gaan soek wat ek kan hoor en sien wat my na n happy place toe kan vat. Dankie dankie dankie!!❤❤
Tannie Frannie said:
Kry julle empaths baie jammer, want julle dra ekstra swaar, maar wat sou ons tog sonder julle gemaak het?
woordnoot said:
Ai Frannie…dankie dat jy verstaan.
VirgoC said:
Frannie, jou “behalwe verlange…en die is maar altyd daar, waar ek ook al is” is seker van die waarste woorde ooit, en is so mooi gestel. Jammer dit is so naby jou, hoe blessed is hulle nie dat jou kinders na hulle kan kyk nie. Dat daar wel rede met sulke goed is, dit weet ek, maak dit nie makliker nie, maar amper meer “aanvaarbaar” op manier. Maar soos Woordnoot se, jy inspireer mens om met ‘n doel te gaan doen. Dankie. Dink aan jou daar en jy laat my dink nou aan wat ek sien en hoor…
Tannie Frannie said:
Jy is op die frontlinie, ek haal my hoed vir jou af!
VirgoC said:
🌻💜
Aletta - nowathome said:
Ai Frannie, soms verstaan ons nie hoekom dinge so uitwerk nie, maar weet tog dat daar wel ‘n rede daarvoor sal wees! Ek hoor en ken verlange!Geniet die verlenngde tydjie daar en weet ons aan jou dink!
Tannie Frannie said:
Baie dankie…
Aletta - nowathome said:
💕
coetzee2014 said:
Ek moes, hierdie eers gelees het. Jy is op ‘n goeie plek, waar jy, wat jy hoor, kan geniet. Ja, ek ken ook daardie verlange, maar, het so baie om voor dankbaar te wees. Ek is, op ‘n gawe plek, waar ons grootste stres, die probleme van ander is. Mens is mos maar geraak, deur die probleme van ander, waaran jyself, niks kan doen nie. Sterkte!!!
Tannie Frannie said:
Daardie probleme maak seer, juis omdat mens self niks daaraan kan doen nie.
Positief said:
Sterkte tannie, ons verlang na jou, maar eintlik voel dit asof jy hier is. Tegnologie is darem maar wonderlik, ons kan mekaar se vreugdes en leed deel an enige plek in die wêreld.
Tannie Frannie said:
Dankie, liewe Positief – ek het nou ‘n Kaapse draai daar op jou blog gaan maak en heerlik gedans op “Briljantjie”, waar ek beland het na ‘n afdraaipaadjie 😉
Bondelsgedagtes said:
Ek is jammer tannie kom nie huis toe nie maar bly dat tannie geborge is by mense van omgee en liefde. En die wete dat die Een wat selfs ‘n sug hoor, ook dáár by tannie is. Ek is nou op ‘n plek van stilte, en ek hou daarvan
Tannie Frannie said:
Baie bly dat jy hou van die plek waar jy is!