Rebusfontein – die towerplek waar selfs horingoue tannies op Harleys ry en nuwe liefde vind…
Woordnoot se uitdaging om ‘n konsert in die lieflike Rebusrus Amfiteater te reël, het aan ons blogmaats oneindige plesier verskaf. Daar is nog twee dae oor voor hierdie skakel na InLinkz toemaak, en ek besef dat ek net eenvoudig ‘n konsert aan Silver sal moet opdra. Wat sy motorfietsmakkers daarvan gaan dink, weet nugter!
Hoe het ek dit tog waardeer dat die Towerinne (met VirgoC op die voorpunt, entoesiasties deur die ander ondersteun) hulle laasjaar op ons reis deur Suid-Afrika oor my ontferm en ‘n virtuele liefde vir my geskep het! Want dan is dit effens makliker om in die werklike lewe oor ander se geluk te lees en vrede met my eie alleenpad te maak.
Daar ry Silver toe op sy Harley in my droomlewe in – en hierdie liedjie vang my onwillige aangetrokkenheid so goed vas. (Kyk net hoe geniet Laurika die kuns van ‘n briljante musikant.)
Om te stry teen die liefde is ‘n onbegonne taak, al is dit slegs ‘n hersenskim. Wat sou ek wou gegee het om eenmaal in die werklike lewe so ‘n allesoorrompelende liefde te kon belewe as die een waarvan Karen Zoid sing…
Die volgende lied is vir my ‘n besonder nugtere beskrywing van hoe ware liefde behoort te wees. (Hierdie twee kunstenaars se intense, dog ingehoue, emosie is vir my so mooi – ek raak net nie moeg om na die video te kyk nie.)
Op die ou einde glo ek graag met my hele hart in die liefde, al was standhoudende liefde toe nou nie in hierdie lewe vir my beskore nie.
woordnoot said:
Ag Frannie…..dis ongelooflik romanties!! Ou Silver kan sy ou motorfiets tyres agterna gooi!!!
Toortsie said:
Ek is so bly jy het vir Sver gekry. 😊👀
scrapydo2.wordpress.com said:
The rose het ook groot sentimentele waarde vir my. Jou keuse is baie mooi en meesleurend.
HesterLeyNel said:
Dis ‘n baie mooi versameling wat jy gekies het. Silver is ‘n gelukkige man. Soms is verbeelding dalk beter as die werklikheid?
Una said:
Oeeee, dis ń lekker klomp musieke hier bymekaar, Frannie. En jy die ewige romantikus.
Vuurvliegie se lekkervurigeaffêre said:
Ag, ek wag heel week vir jou en Silver se musieke – kyk nou hoe mooi!
perdebytjie said:
Dis so pragtig romanties…mens mag maar droom, al was dit mens nie beskore nie. Mooi musiek…alles my smaak ook. Pragtig geskryf, Frannie!
Kameel said:
Ai Frannie my hart klop warm vir jou en Silver. Sien julle saam daar op die gras sit; sy arm styf om jou en jou kop op sy skouer terwyl julle na die pragtige musiek luister.
Dr Christa van Staden said:
En ek voeg Silwer de Lange by, vir jou Silwer. Ons het lieflike restaurant hier. Serebro. Wat Silwer beteken.