Vandag se blog-por is “Tea”. Omdat die uwe verslaaf is aan tee en ook aan blog-skryf, gehoorsaam sy summier. Ook om vir julle te laat weet dat dit wonderlik is om weer by julle almal te kan lees en te hoor hoe dit gaan – ons is nou weer op ‘n plek met wifi.
Ek hou van die Amerikaners. Hulle is vriendelike, hartlike mense, wat weet hoe om verjaarsdae en herdenkings en seisoene behoorlik te vier. Ek verstaan hulle taal (meestal) en verduidelik graag my aksent, wat orals opgemerk word. Dis lekker om in ‘n wêreld rond te beweeg waarin daar bekende elemente is, wat tog nie heeltemal bekend is nie.
So neem my dogter my en haar vriendin H na Camellia’s Sin Tea Parlor, ‘n bekoorlike teekamer in ‘n geskiedkundige ou dorp/amper stad Carlisle, hier in Pennsylvania. Hulle verduidelik hulle naam so:
Camellia sinensis is the botanical name for the tea plant; hence Camellia’s “Sin” (Did you know that all of the tea you drink comes from this one plant?)
Die voordeur van die geskiedkundige geboutjie sit vlak op die straat.
Met die geskenkwinkeltjie links, stap mens deur ‘n gang wat uitmond in die wonderlikste spasie, ‘n groot ou eetkamer met ‘n yslike bow window en fraai gedekte tafels: fyn porselein, sierlike teepotte, mooi tafeldoeke en bypassende lapservette.
Daar is ‘n muurkas met nog teepotte en koppies; ‘n rak vol hoede waaruit mens een kan kies om te dra terwyl jy teedrink, as jy sou wou; die mooiste muurversierings.
Hier drink mens tee soos mens elders wyn drink: die een na die ander koppie saam met die vasgestelde spyskaart: sop, slaai, skons (sout en soet) en les bes, ‘n dubbelverdieping-koekbord met soet en sout happies. Dis ‘n eienaardige volgorde, maar dit werk goed en die porsies is (dankietog!) mooi klein en fyn, nie so skrikwekkend groot soos wat dit gewoonlik in die VSA is nie. (Ek onthou nou nog my skok toe ‘n “medium” Starbucks-koffie aan my oorhandig is…)
‘n Mens mag agtereenvolgens drie teepotte vol kies uit die oorstelpende verskeidenheid geure, op voorwaarde dat jy elke teepot eers leegdrink – We don’t like wasting tea! Ons het die volgende geure kafgedraf:
Snowflake – a black tea with coconut, almond and cinnamon; Pineapple upside down cake – a black tea with pineapple and cherry bits with caramel flavor; Fairy dust – a black tea blended with vanilla, spices and botanicals.
Ek het die tee swart gedrink, met een suikerblokkie in elke koppie, netjies deur ‘n suikertangetjie vasgeknyp en afgelewer. Diep asemteue het my laat besef dat die tipies Amerikaanse oordaad van gemengde geure (niks hier het net één geur nie!) tóg kan werk. Moet egter erken dat ek nie meer reg aan die Fairy dust kon laat geskied nie…
My liewe dogter noem hierdie uitstappie met reg ‘n viering van vrou-wees. Waar sou ons wees sonder tee?
Tannie Frannie 
klink behoorlik na vrouebederf
Ek wou ook noem dat hierdie ‘n plek is wat veral ‘n vrou kan geniet. Maar die man in my kan nie help om aan “Boston Tea Party” te dink nie, toe dit tee van 3 skepe in Boston se hawe gegooi is as ‘n protes teen die Britse belasting wat daarop gehef is. 45 ton tee is in die see gegooi wat die Britte strenger reels teen Amerikaners laat ople het en op sy beurt weer bygedra het to die Amerikaanse rewolusie 16 maande later.
High society ne!
Maar ek sorg dat my pinkie mooi platgevou is…
😀
Dit klink na ‘n gawe plek. Hier was ‘n ou oom, wat altyd gesê het: Let’s go and have tea like people. Daar sou hy dit geniet het.
Like real people! Hoekom is jy so stil op die blogs? Sou graag weer oor jou wereld wou lees.
Was vir 6 weke in die ou Heimat en met die baie kuier, was daar nie tyd vir skryf nie. Hopelik, na die more, verskyn daar dalk weer iets.
Nou kyk net hoe word julle bederf! Is dit nie die mooiste plekkie nie, Frannie. Ek het ingezoom op elke foto sodat ek al die detail kon inneem. Al die fyn dècor slaan mens se asem skoon weg.🌸
So baie bly dat my mik-en-druk-pogings jou darem ‘n idee kon gee van die mooi omgewing.
Sjoe dis mooi!
Ja, hulle doen regtig moeite.
Baie goeie Blog gewees. Wel gedaan! Ek voel skoon jaloers oor die ervaring en tee drink bederfie!! Dankue vir die deel.
So bly jy het daarvan gehou, Aspaai.
Ek dink ek sal ook in hierdie omgewing tee drink (ek drink gewoonlik net tee as my gasvrou daarop aandring dat ek iets moet drink, nie omdat ek daarvan hou nie). Hierdie plekkie is egter so mooi dat ek selfs lus voel om ‘n hoed op te sit vir die seremonie.
Jong, daar is hoofbedeksels te kus en te keur! Kan jou net sien…
🙂
Bly jou dogter is darem weer op en aan die gang.
Lyk na ‘n heerlike uitstappie Ek is skoon jaloers
Hoe graag sou ek jou en jou sus soontoe wou vat! Ons sou soveel pret saam gehad het.
Hehehehe as ek net aan ‘n vliegtuig dink word my kop seer.
Wow dit lyk nou die moeite werd. Was nog nooit by n regte teetuin soos daardie ou historiese plek nie.Dis lekker om so saam met jou kind dinge te doen. Gee jou weer pitkos vir die tyd wanneer jul ver van mekaar is. Geniet elke oomblik. O, ek weet hoe dit voel om darem die taal te verstaan al kan mens nie altyd byhou met volg nie!
‘n Mooi gedekte teetafel bly darem maar mooi.
Die plek klink na my droom. Ek is baie lief vir tee, veral High Tea, geskink in Prins Alberts of Noritaki, met lekker scones, goeie geselskap en naeltjie sigarette. Die plek lyk so lekker
Ons was vandag weer daar, al is dit ‘n hele ent se ry. Vandag het ons buite in die tuin gesit. Sou so ‘n teedrinksessie saam met jou baie geniet!
Dit kan epies wees. Niks lekkerder as ‘n goeie tee en goeie geselsskap nie, met ‘n komkommer broodjie by natuurlik
Dit is mos hoe tee gedrink moet word…. geskink uit pragtige teepotte, in verfynde koppies. Klink na ‘n heerlike uitstappie!!!!
Wie is die persone in die foto?
Mmmm… lekker tee! Ek drink dit nie maar dit lyk of julle ‘n baie goeie tyd in die teewinkel geniet het!
Een ding wat in my kop rondgaan is die ou “bull in a china shop” storietjie! Ek is geneig om goed te laat val so ek sal maar daar uitbly! 😉
Ek is ‘n koffiedrinker, maar my een seun is gek oor tee en die ervaring daarvan, het selfs vir hom een van daai vlamverwarmertjies en elke nou en dan koop hy een of ander interessante blik teeblare, ten duurste. Hy sou nou lekker in daai teewinkeltjie gekuier het!