Toe ek afgeskaal het om in my kamer onder Laatlam se dak in te pas, het ek winkelsakke vol boeke by tweedehandse boekwinkels gaan aflaai. Ten spyte van daardie opoffering, sit ek steeds met twee vol boekrakke en noudat die gemeentebasaar nader kom, is dit die ideale geleentheid om verder uit te dun. Maar ek sukkel …
Ek wéét daar is mense wat op basaardag gaan snuffel en van “my” boeke sal opraap. Hier is bv. JC Steyn se biografie van NP Van Wyk Louw, die twee lywige volumes mooi verpak in ‘n kartonomhulsel, amper nuut – net ek het dit nog gelees. Toegegee, ek gaan maar hardhandig met ‘n boek om – nie soos my liewe dogter nie, wat ‘n boek sagkens behandel, sodat mens skaars sou kon dink dis al gelees. Dis juis sy wat hierdie kosbare biografie vir my gegee het, hoe kan ek dit dan nou ooit wegmaak? Nog een van die mooi hardebande wat ek van haar present gekry het, is Pieternella van die Kaap deur Dalene Matthee, wat lank weg was uit my lewe en weer opgeduik het toe ‘n vriendin wat dit geleen het, dit aan my teruggee. (Skuldig voel ek nou, want hier is ten minste drie geleende boeke wat ek nooit aan hulle eienaars terugbesorg het nie …)
Sal ek nou maar tog uiteindelik ontslae raak van die ou sagtebandboekies vol Engelse poësie uit my studentedae, wat ek ten spyte van vrome voornemens nooit ooit weer oopgemaak het nie? En wat van Shakespeare se individuele dramas, sulke eenderse boekies met eenvormige omslae? Hier is nog van my dogter se boeke, ten spyte van die swaar tasse wat ek soms vir haar na die VSA toe aangesleep het, maar hulle kan ek maar wegmaak, want sy het self erken dat sy soortgelykes agtergelaat het toe hulle ‘n rukkie terug na ‘n ander staat verhuis het. Die paar Nora Robertse kan ek dalk onder in ‘n boks wegsteek, sodat niemand by die kerk sal weet dis ek wat hulle daar aangebring het nie. Hmm, wonder of iemand daar hulle sou wou aanskaf … Hier is een of twee outobiografieë van Afrikaanse persoonlikhede wat dalk byval sou vind, maar hoe sal ek ooit my enkele boeke oor die Afrikaanse toneel kan laat gaan? En wat van die Nederlandse voorgeskrewe werk wat ek nog altyd weer wou lees?
Iemand sou dalk die eerste sangbundel van die F.A.K. waardeer; moeilikheid is net dat my mammie voorin geskryf het: “Aan V met baie liefde Van ouma 1987”. Ek blaai daardeur en ontdek ‘n musiekrapport van Middelkind, uit die dae toe hy tuba gespeel het in die kadetorkes en toe by Pro Arte gaan les neem het. 80% en sy meneer skryf: “Pragtig gespeel dankie”. Ek onthou ‘n heerlike artikeltjie wat ‘n bibliotekaris geskryf het oor die wye verskeidenheid boekmerke wat mense agterlaat in die biblioteekboeke wat hulle kom omruil – hierdie rapport sou ‘n waardige plek in daardie versameling kon beklee.
As ouma het ek liederlik gefaal in my roeping om die twee kleinkindertjies wie se onderdak ek deel, lief te maak vir lees. Hulle sit graag voor skerms, waar histeriese prototipes van die luide Amerikaner te kere gaan – hoe sou ouma met haar gekraakte stem en ‘n ou boek in die hand nou daarteen kon meeding? Maar die hoop beskaam nooit – juis hierdie wintervakansie beplan ek ‘n biblioteekbesoek. Dit lyk asof Gabby boekwurmneigings toon, sy is opgewonde oor die skoolbiblioteek en het nou-die-dag Diary of a Wimpy Kid by ‘n maatjie geruil en met net twee sittings deurgelees (twee, want die aand het laat geword). Joshua is ook vatbaar vir betowering, dus sal ek kyk wat ek kan regkry.
My ouers was lief vir boeke – toe hulle boeke en meubels geberg was terwyl hulle huis laat bou het en die hele stoor afgebrand het, het my mammie ‘n paar van hulle boeke uit die puin gaan opgrawe. Alhoewel my pa nooit weer eintlik boeke vir homself gekoop het nie, was ‘n boek altyd ‘n gewilde geskenk aan my en my boetie. Voorin is die opdrag geskryf: “Aan … op jou verjaarsdag”; of “Aan … met liefde van …” en die jaartal. Ek het van daardie blaaie uitgeknip voor ek boeke weggemaak het en dit was pynlik. Een boek wat ek nie gaan wegmaak nie, is DJ Opperman se Groot Verseboek van 1973, met die opdrag voorin: “’n Klein geskenk vir ‘n wonderlike sus. Luv T.” My boetie en sy gesin woon nou al lange jare in Nieu-Seeland – ai, hoe mis ek hom! Bo-aan dieselfde bladsy het my dogter haar volle naam in kinderlike potloodskrif geskryf toe sy die bundel oorgeneem het vir haar hoërskoolloopbaan. Daarna was die boek maar weer myne.
My Kindle is wonderlik, ‘n teenvoeter vir die ellendige beurtkrag wat nou weer aand vir aand ons lewens versuur en ons slaappatrone om-ellie, maar daar is niks soos die belofte van ‘n nuwe, stewige hardebandboek of ‘n voos gelese biblioteekboek nie.
granny1947 said:
I can so relate Frannie.
I too have to thin out my books.
My Terry Pratchett books will stay.
I think my J.D. Robb books can go (Nora Roberts)
No wait, think my DIL will love them.
Now to find someone to take them down to her.
Tannie Frannie said:
Janee, Granny, Terry Pratchetts hou ‘n mens, dit bly ‘n vreugde om hulle weer te lees. JD Robb is baie bloeddorstig, maar boeiend. Kan jy nie sommer self gaan kuier en die boeke saamvat nie? Die kompleks kan seker maar ‘n rukkie self opsnork 😉
de Wets Wild said:
Ek is ook skuldig daaraan om boeke bymekaar te maak en te hou. Nie storieboeke nie, maar natuurboeke, vedlgidse, en so. Feitelike goed. Van soveel het ek al die hoeveelste hersiening, maar ek kan net nie die voriges wegmaak nie. Ek koop tot ouer weergawes van nuwe boeke wat ek klaar het – hoe simpel is dit!? Ons almal het maar die kluts kwyt op een of ander vlak.
Tannie Frannie said:
Ten minste is dit ‘n presentabele nuk, Dries!
scrapydo2.wordpress.com said:
Dis gladnie ongewoon om so te voel nie as jy ‘n boeke liefhebber is. Voor ek in 2009 hierheen gekom het moes ek ook ontslae raak van werklik argief materiaal en ou boeke wat nie meer tekoop is nie. gelukkig was daar ‘n onderwyser wat ook boeke mal was en hy het alles by my oorgeneem. Dit was ‘n verligting gewees. Ek het steeds my Engelse skoolboeke, Groot verseboek, FAK en my HAT woordeboek saamgebring. Hul is steeds my rykdom. Gooi natuurlik nie my hondeboeke en melkbokke knipsel ook nie weg nie, hul is steeds veilig ingepak weer.
Tannie Frannie said:
Dis wonderlik as mens weet jou boeke kry ‘n goeie huis.
scrapydo2.wordpress.com said:
Is so. Die ou was/is ‘n verstokte oujongkêrel gewees. Mal oor alles wat boek is. Wonder hoe dit met diu ou gaan(hy was nogal mal oor my, waarvoor ek maar bietjie teruggestaan het)
Anne said:
Ek is ook besig om my boekrakke deur te gaan. Party gee ek vir Hospice of die SPCA winkel, ander aan vriende … maar ek koop nog boeke! Dit is ‘n baie moeilike taak. My Groot Verseboek het ek nog asook ‘n sangbundel van die F.A.K. Shakespeare is nog hier …
Tannie Frannie said:
Interessant, dat die bloggers eenderse smaak het. Is julle kinders uit die verre land nou daar by julle, Anne?
Anne said:
Dit is die rede dat ek so stil is 🙂 🙂 Vandag is hulle laaste dag saam met ons.
Tannie Frannie said:
Ai, Anne…
wetanddustyroads said:
Ek het nie ‘n probleem met afskaal nie – ek geniet dit eintlik om so bietjie leeg te maak … maar o wee, as dit by my boeke kom, is dit ‘n ander saak! Ek is lief vir storie boeke (Afrikaans) en het nog ‘n boks vol boekies wat my ouers vir my as geskenke gegee het toe ek kind was. My ma het vir baie jare in ons klein dorpie se biblioteek gewerk en ek het soms sommer my huiswerk daar gedoen (so vinnig ek kon, want dan het ek ‘n boek gaan soek om te lees – ek het die Saartjie en Tessa van Maasdorp reekse seker 10 keer oorgelees ☺️).
My verskoning: Ek kan nie my boeke weggee nie, want ek lees dit weer (en ek doen) … maar, so in die geheim, koop ek nog elke maand ‘n boek by!
Tannie Frannie said:
‘n Ware bibliofiel!
wetanddustyroads said:
Daar leer ek ‘n nuwe woord … en ek’s mal daaroor!
Bondelsgedagtes said:
Sjoe tannie het omtrent n ryk versameling. FAK!!! Amasing. 💐
Tannie Frannie said:
Daardie een kom nog van my mammie af. Haar Hallelujabegeleiersboek het ek weggegee en ai, ek mis dit nou nog soms.
Bondelsgedagtes said:
Ek kan dink. Dis kosbare skatte wat mens altyd moet koester
woordnoot said:
Jou boek versameling is besonders! Ek het ook ‘n lot boeke wat ek nou op Instagram probeer verkoop. Die probleem is dat ek ‘n hele paar “trift shops” op Instagram volg en dat mens gewoonlik puik boeke van jou geliefde skrywers vir ‘n belaglike bedrag kan koop. En jy bou ‘n bondel. So kom die bondel dan by jou aan en dan is dit maklik 5 of 6 boeke! Nou het ek dit opgehou volg want ek spaar nou hard vir Skotland….maar die boeke lê nog hier. Eish…ek sukkel om nie ‘n boek te koop nie!
Tannie Frannie said:
Byt vas, maar belowe jouself jy gaan een wonderlike boek vir jouself in Skotland koop, ter herdenking aan jou epiese kuier.
woordnoot said:
Dankie Frannie….laas keer het ek n tas vol boeke gebring want mens koop nuwe boeke vir een pond…..
Aletta - nowathome said:
Frannie ek verstaan hoe jy voe! Ek is ook baie lief daarvoor om ‘n regte boek te lees! Is ook maar moeilik om van hulle weg te gee of van ontslae te raak!
Tannie Frannie said:
Ek dwaal soms nog rond van verlange na ‘n spesifieke weggemaakte boek…
jackgreeffjr said:
Ons moes ook laasjaar noodgedwonge trek, en ons het besef ons het “heeltemal te veel boeke”. Na ñ uiters moelike uitdunning het die oorblywende boeke in plastiek kratte ingegaan (want karton bokse is nie veilig genoeg nie) om gestoor te word tot ons weer ñ huis het. Vir die laaste jaar + is ons eintlik iewers halfpad tussen haweloos en nomadies, en my bedkassie het klaar weer in ñ boekrak verander vol nuwe boeke…
Tannie Frannie said:
Laat jy my nou glimlag oor jou bedkassieboekrak.
daisyopdiestoep said:
Ja, nee, selfs ek sal moeilik van sulke onvervangbare boeke ontslae kan raak. Ek self het ook 2 boekrakke vol boeke. Met ons trek het ek geweier om van die amper of oor die 300 boeke ontslae te raak. Ek sal op my inventaris moet gaan kyk hoeveel boeke ek nou het. Ja, ek het ‘n lys. Dis mos mens se vriende. Wat is ‘n mens se lewe sonder boeke? Jy kan ook dit aan ‘n organisasie soos Eseltjiesrus by McGregor skenk wat dit verkoop as inkomste vir hulle donkie sanctuary. ‘n Idee waarvan ek nogal hou.
Tannie Frannie said:
Lank terug was daar ‘n blogger wat oor “McGregor se dinge” geskryf het. Ek mis haar nou nog. Eseltjiesrus is sommer self ook ‘n wonderlike idee. O, en ek’s beindruk met jou lys boeke, dis nou geordend! 😉
daisyopdiestoep said:
Eseltjiesrus se donkies is baie oulik. So het ons al na ‘n groot kat (leeus, tiere, luiperds en swart luiperd en selfs rooikat sancturary toe gegaan en nou die dag na ‘n wolf sanctuary.
elsabeskryf said:
‘n Boekrak vol boeke vertel ‘n storie. Ek het ook oorgeskakel Kindle toe. Ek het tans seker 200 boeke daarop. Snags kan ek hom oopklap en lees sonder om wederhelf met ‘n leeslig te pla. Ideaal vir vakansiereise… pas in my handsak en ek hoef nie swaar en groot boeke neem nie spasie op nie. Goedkoper ook. Die flou boeke word uitgevee, die oulike boeke word in ‘n spesiale lêer gebêre. Met bookpub kan mens jou genré’s kies en daagliks gratis of spotgoedkoop boeke aflaai. Vir seker ‘n wen.
Tannie Frannie said:
Dis die eerste keer wat ek van Bookpub hoor, watter wonderlike woordspeling.
Toortsie said:
Hoe lekker lees ek nou hier by jou!
Tannie Frannie said:
Dis een van die vele dinge wat die bloggers gemeen het – hulle liefde vir lees. Is julle terug by die huis? Gaan jy kom blog oor julle vakansie? Ag toe, seblief?
Toortsie said:
Veilig terug. Ja, ek dink nou nogal dat ek iets kan vertel. Sal bietjie dink. 😁
Tannie Frannie said:
Aww, dankie, ek het so lekker gelees.
woestynkind said:
Oee. Ek wens ek het nader aan jou gebly. Ek is n sucker vir boeke. Mal oor outobiografie.
Tannie Frannie said:
Skryf jou eie outobiografie! Ek onthou nou nog jou blogs oor jou kindertyd in Angola, dit was so interessant. En jou blog oor die olifante wat aan jou gesin herinner, dit was werklik roerend.
appeltjie said:
Ek het my dogtertjie ook grootgemaak met boeke. En sy doen nou weer met haar eie dogtertjie. Ek looooooove my eboek. Kan dit enige tyd in die nag lees. En daar is reekse van Nora Robberts op en JD Robb.
Positief said:
Ek geniet ook ‘n lekker boek, het sommer klompie hier, ek gaan hulle almal saamsmokkel Mozambiek toe, ek sal eerder die klere weggee
kammakastig said:
Ek was ook onlangs gedwing om ontslae te raak van my boeke – selfde ding: eenkamerblyplek by die kinders – en sowaar as vet, toe iemand hier plaaslik twee T.O. Honiball-boeke adverteer, kon ek die versoeking nie weerstaan nie.
Tannie Frannie said:
Laat jy my nou glimlag…
Will van der Walt said:
jJa, ons wat boeke liefhet, ons is ‘n stam op ons eie. Vreemd hoe dat die verlies van boeke ‘n angs in my opjaag. Pragtige stuk, Frannie. En dank vir die steun wat jy op ‘NP en die blues’ gee! – groetnis, willem
Tannie Frannie said:
Dankie vir jou kommentaar, Willem. Ons het Van Wyk Louw se “Klipwerk” o.l.v. A.P. Grove bestudeer – hy was nie beindruk met my vertolking nie 😉