Julle weet Rebusfontein is denkbeeldig, ne? Maar die res van die storie is nie…
Frannie sit in die middel van Rebusfontein se verlate dorpsmeent. Aan haar voete lê Lelik en Danie – die res van Rebusfontein se diererykdom is skoonveld, nes die inwoners. Hier is geen ander mens of dier te siene nie! Frannie voel sommer behoorlik allenig en dis alles die dekselse Covid se skuld. Aan die ander kant is dit seker net so wel, aangesien sy haar voorgeneem het om hier te kom self-isoleer, nie om te kom ginnegaap in tipiese Rebusstyl nie.
Maandagoggend het Laatlam positief getoets. Dinsdagaand het Gabby nog haar ouma se hare in bokstertjies gekam, voordat die kleintjie Woensdagoggend vir twee koorsige dae op haar bed gaan lê en jammerklaag het. Joshua was Maandag hewig siek – en Dinsdagoggend perdfris, tot nou toe nog! Frannie het van Woensdag af begin griepmedisyne drink en in die bed gekruip, mens kon met haar niks uitrig nie. Haar skoondogter het soos ‘n brose skim deur die huis beweeg, die nodige gedoen gekry, uit blote wilskrag staande gebly.
Vanoggend besef Frannie sy voel beter. Almal in die huis is egter kort van draad. Joshua raas meer as gewoonlik oor die “hmmm’s” en “oukeis” waarmee ouma probeer om hulle (hoofsaaklik eensydige) gesprek aan die gang te hou. Laatlam maak planne vir groentesop, maar Frannie weet dit gaan nog ure duur voor dit reg is vir eet. Ai, en sy is so honger! Ja, en sy weet sy moet baie dankbaar wees dat sy honger is, want dit beteken sy’s beter, maar op hierdie oomblik maak dit haar net al hoe meer befoeterd.
Daar is net een uitweg: Rebusfontein toe. Sy sal in haar toringhuisie gaan bly en vir nog ‘n week en ‘n half wegbly van alles en almal af, soos wat ‘n verantwoordelike inwoner behoort te doen. Sy sal dalk so af en toe melodramaties by die toringvenster vir die ander inwoners wuif, net sodat hulle kan sien sy mis hulle en besef hoe offervaardig sy is en so aan…
En nou is daar niemand om voor te wuif nie! Geen musiek agter Woordnoot se groen deur nie; Toortsie se gordyne is almal toegetrek; Seegogga se stoep, waar Frannie haar sovele keer aan die heerlikste vrugtekoek vergryp het, staan leeg. Una se huisie is duidelik bottoe. Frannie sug en trek saggies aan Danie se ore. “Hei, ou grote,” prewel sy, “ek kan verstaan hoe Esau sy erfporsie vir ‘n pot lensiesop kon verkwansel…”
pieterriedemann said:
Pragtige vertelling. Spoedige beterskap vir almal!🌸
perdebytjie said:
Ai Frannie! Word gou beter.💕
Tannie Frannie said:
Dankie, ‘Bytjie, ek’s hard besig…
perdebytjie said:
As jy gesond is, gaan ons teedrink, hoor!
Tannie Frannie said:
Oe, ja, asseblief!
Tannie Frannie said:
Baie dankie, Pieter – ek waardeer jou goeie wense.
Una said:
O nee, ek is oppad! Covid gaan jou g’n laat alleen voel nie! Hierdie inpakkery kry my effe onder so ek is in my kar met versterkinkies!!! Daardie pienk goedjies wat op die eiland gedrink is, is net die regte medisyne vir alleen kwarentyn. Groentesop se alie, ek het lamsribbetjie en groente, met poeding ingelaai! Sien jou nou!!!!!💃
Tannie Frannie said:
Aitoggie, Una, hoe lus maak jy my! Dankietog jy bring sulke lekker kos, want dit lyk my nie asof die sop vandag nog gaan materialiseer nie.
Una said:
Jy is mos baie lief vir ń ou skaaptjoppe?😘
Tannie Frannie said:
Jaaaa! maar weet jy wat? Die sop is toe wel gekook en.dit.was.heerrrlikkk!
Una said:
Ek kan so dink. Groentesop bly ń wenner. Laat weet my hoe jy voel.
Tannie Frannie said:
Ek voel verstommend goed!
appeltjie said:
Dis lankal weer tyd vir n rebus storie. Sterkte Frannie
Tannie Frannie said:
Dankie, Appeltjie – ek stem!
VirgoC said:
Hoop jy voel gou beter tannie Frannie🌻🌻🌻
Tannie Frannie said:
Dankie! Ook vir my eie-eie gesondheidsregimen wat jy so dierbaar aangestuur het.
VirgoC said:
🌻🌻🤗
scrapydo2.wordpress.com said:
Ek voel met nou. Het juis gister my covid tydperk geskryf. Sal seker hopenlik vandag gepos word.hoop jy voel vinnig beter. Hou jou maar ekstra rustig en stil.. hope simpatie en liefde vir jou.
Tannie Frannie said:
Baie dankie liewe Scrapy. Mag dit gou voor die wind gaan, daar by julle.
scrapydo2.wordpress.com said:
Dankie Frannie ek hou sommer my duime en tone vas vir vinnige beterskap hier en by jou ook.
seegogga said:
Ai, Frannie, hou moed! Ek is ook op pad. Net gister gedink ek moet Rebus toe om te rus. Word julle almal intussen asb mooi gesond.
Tannie Frannie said:
Bring asb vrugtekoek?
seegogga said:
Ek maak so!
daisyopdiestoep said:
Gou gesond word.
Tannie Frannie said:
Baie dankie! Ons is amper terug by normaal.
Positief said:
Nou is ek honger en lus vir ‘n glasie pienk (of rooi) iets om te drink. Hoop tannie voel vandag al reeds stukke beter
Tannie Frannie said:
Dankie – ek voel weer mens!
Toortsie said:
Ai, Frannie! En hier hoor ek nou eers dat jy ook die nare C gehad het! Dit klink darem of jy beter is en heeltemal lank genoeg geisoleer het.
Will van der Walt said:
Pragtig geskryf. Hartlik dank. En dankie vir die steun oor “Swye” – willem
trommeltjies said:
Frannie ek sal ook moet kom saam met jou siek wees, ek lê juis op my bed en tik. Hoop julle is almal gou beter.
Tannie Frannie said:
Dankie Trommeltjie – ons is almal weer perdfris en aan die gang. Ek dink aan jou en hoop jy gun jouself ‘n behoorlike rustydperk.
trommeltjies said:
Gelukkig is my covid toets negatief, nou net hierdie virus af skud wat hom hier in my lyf tuis gemaak het
Will van der Walt said:
Baie dankie vir die steun met “France moments”. Groetnis, willem
Bondelsgedagtes said:
Sjoe bly tannie voel beter, Rebus se vrede sal help met rus