Om boeke op te ruim, is hartverskeurend. So kry ek heel toevallig blyke van my pa se liefde, in die opdragte voor in boeke se skutblaaie geskryf.
Ek soek uit: M.E.R. se outobiografie – My beskeie deel – my kinders sal nie eens weet wie dit is nie. Op die skutblad, in my pa se bekende, geliefde handskrif, staan daar:
“Aan Cisca Van Mamma en Pappa 28/12/1972.”
Voor in Dankbaar Die uwe, Anna Neethling-Pohl se outobiografiese “geselsies, verwerkte radiogesprekke” lees ek:
“Kersfees 1974. Met liefde. P.” Dit was ‘n geskenk van my pa aan my mammie, op die laaste Kersfees wat ons hier op aarde in sy geselskap kon vier.
Nog ‘n boodskap, dié keer in Eugène Marais se lewensverhaal Die groot verlange deur Leon Rousseau, lui:
“Kersfees 1974. Vir pappa, met innige dankies vir ‘n kosbare rukkie van saamwees. Van ‘Us-‘Us.” (Dit was my troetelnaampie, gemunt deur my kleinboetie toe hy nog nie “sussie” kon sê nie.)
Hoe bly is ek om hierdie blykie van waardering aan my pa te sien! In ‘n vergange briefie van my Tannie Katy skryf sy juis:
“Ons wil jou ook baie gelukwens met jou pappa se verjaardag. Mag hy nog lank vir julle gespaar bly en nog steeds toegewyde liefde van julle ontvang en ook aan julle gee. Dit is eers as ‘n persoon of ‘n diertjie nie meer daar is nie (sy moes pas van haar geliefde foksterriër afskeid neem) dat ‘n mens dink: Ek kon nog dit of dat gedoen het om sy of haar lewe aangenamer te maak en waarom het ek só of só opgetree as ek anders kon?”
Tannie Frannie 
Kosbaar! Boeke sal nooit vergaan nie en hart en siel vir ewig verryk.9
Dis daai boeke….daai met die boodskappies in, wat my altyd laat wonder. Veral as mens iewers n tweedehandse boek koop. Dan hol mens se gedagtes. Maar dis so kosbaar Frannie. Dis regte goud, nie klatergoud. 🤩🤩
Ek kan net dink hoe die boodskappe jou Frannie-hart aanraak.🌹
Ag, dis hartseer-mooi Tannie Frannie. Sulke kosbare herinneringe … Tannie Katy se boodskappie is so pragtig (en absoluut van toepassing in vandag se lewe) 🌸.
Ja daardie boodskappies is vir my ook so belangrik. Ja, kon ek nie maar meer vir my ma gedoen het nie, nicer gewees het en minder vol draadwerk nie? En hoe gebeur dit dat n boek met ‘n boidskappie voorin op ‘n kermis tussen die tweedehandse ( ongeliefde) boeke beland?
Oeee dis moeilik om van ‘n boek afskeid te neem! Lekker onthou Frannie🌿🌿🌿
Sterkte. Ek het al boeke weggegee en spyt gekry daaroor. Dis nie maklike nie.
My vrou noem my ‘n “hoarder”, ek het dit by my ouers geëerf, my pa is ‘n wees-voorbereid-vergaderer en my ma was ‘n sentimentele een. Ek is altwee gekombineer, en ek probeer so bes ek kan om van ‘onnodige’ dinge ontslae te raak, maar van als is boeke die moelikste… Ek haat dit. Sterkte Tannie
En hier kry ek nou vanmiddag n enorme en onverwagte geskenk van Tannie Frannie af. Duisend dankies vir die gidse wat Tannie vir my gestuur het – elke een is n versamelstuk en nog soveel meer kosbaar omdat ek dit by iemand so kosbaar gekry het. Ek sal hulle soos goud oppas, ek belowe!
Hulle het nou ‘n veel beter huis gekry!