Joshua speel sy gebruiklike skool-skool in ouma se kamer voor hy moet gaan slaap. Hy is die klas se meneer en ouma is een van sy leerders, haar naam is Frannie. Joshi kry so ‘n gladde, selfbewuste belangrikheid om hom wanneer hy die meneer is en Frannie is die witbroodjie wat alles reg doen en die soetste kind in die klas is.

Vanaand staan Joshua wydsbeen en vas op sy voete. In sy hand hou hy ‘n klerehanger, wat hy met swier in die rondte draai terwyl hy aankondig:

“Maatjies, vandag gaan ons leer oor … (die hanger draai dramaties) … tegnologie! Ons nuwe pandemie is tegnologie.”