Die Oujaar is nooit my maat nie. Toe ek ‘n kind was, was daar Oujaarsdienste wat om 23:00 begin het, sodat ‘n mens om middernag in intense, eerbiedige stilte daar in die kerk die nuwe jaar kon binnegaan.
Laterjare was daar paarties – maar maak nie saak hoe hard ek probeer het nie, die onderliggende heimwee kon ek nooit behoorlik ontvlug nie.
Daar was ‘n heerlike Oujaarsdans in Mosselbaai, opgevolg deur middernagtelike geswemmery en ‘n vars hamburger wat ‘n wildvreemde hand deur die venster vir my aangegee het toe ek “Yes!!” geantwoord het op sy vraag: “Would anyone like a hamburger?”
‘n Gesellige braaivleis op Klapperkop het uitgereën, maar die skouspelagtige weerligstrale oor my geliefde Pretoria het daarvoor vergoed.
Daar was skrynende hartseer tussen baie vreemde mense terwyl ek ‘n vonkstokkie vashou en “Sal ons ou kenn’se” saamsing.
Op die vooraand van 2020 het ek saam met my kinders in die VSA en van hulle vriende gekuier en domino’s gespeel tot middernag toe. Dit was groot pret, maar in die lig van wat daardie jaar met die wêreld gebeur het, het ek vroeg gaan slaap op die volgende Oujaarsaand, wat 2021 ingelui het.
Hoe nou gemaak met vanaand? Die heeldag al is ek net eenvoudig befoeterd, probeer ek werk met klein Joshua se knaende geselsies wat my konsentrasie versteur. Ek hardloop buitentoe in my pijakkies om die asblik uit te sit, want die kinders slaap laat en die vullislorrie is vroeg. Ek vererg my vir die motorhek wat nie behoorlik werk nie, vir die pap vlieë, vir die hitte van die dag…
Net voor ‘n donderstorm vanmiddag welkome lafenis bring, bel Kameel. Watter heerlike verrassing! Dis die eerste keer wat ons oor die foon gesels en haar mooi wense vir die nuwe jaar gee my sommer moed vir 2022. Ek begin my seëninge tel…
Ek weet nou nog nie of ek vanaand gaan wakkerbly nie, maar ek weet wel dat ‘n gunstelingblogger my op hierdie Oujaar moed gegee het. Daarom wens ek julle almal graag ‘n hoogs voorspoedige 2022 toe. Dankie vir julle skrywes, vir die deel van vreugde en verdriet. Julle is kosbaar.
Tannie Frannie 
So het vuurklip ‘n broertjie dood aan ou/nuwejaars vieringe. Dit laat my dink aan die titel van ‘n nederlandse boek:
“Van oude mensen, de dingen die voorbij gaan” deur Louis Couperus.
O, ek ken daardie boek, dit was ‘n voorgeskrewe werk. Soos alle voorgeskrewe werke, ook maar lekker neerdrukkend 😉
Jy het omtrent al baie be lewe. Ek het ook die middernagdienste waardeer. Deesdae is die kerk te gemaklik vir daai moeite. Nou le ek voor die fan, luister na die on weer en kyk Netflix. En loer tussen in na WordPress en whatsup. Stoksielalleen. Wat seker profeties is
Eish… Eintlik moes ons vanaand ‘n Moz-reünie gehou het! Met rooi koeldrank 😘
Ek sal hierdie kant rum en rooi koeldrank doen, dan join jy daai kant
Reg so!
Vanaand is stil – te stil, want ons kleinkinders is weg en die leemte voel oneindig groot. Ek hoor die paddas in die dam oorkant die pad; die stilte binne die huis; elke nou en dan ry ‘n voertuig verby; dit is donker buite – en so stil dat die blare nie eers roer nie. 2021 sal stilletjies verdwyn terwyl ek slaap en my hoop vir ons almal is dat 2022 vir ons almal meer vrolikheid sal bring.
O, ken ek nie daardie stilte nie!
Ons het altyd opgebly tot twaalfuur en na die vuurwerke en toeters geluister. Was van kleins af so. Ek bly steeds elke jaar tot twaalfuur wakker om te wag vir “Sal ons ou kennisse ooit vergeet…” en wat die ander wêrelddele doen. Nou Is my nuwe jaar eerste op lysie so ek sien nie die nuwe jaar in met almal meer nie. Ek wil jou ook sommer badank vir al die jare se kuier en ondersteuning, mag ons nog lank oor en weer kuier in die nuwe jaar. Ekstra stywe druk vir jou vriendin.
Dankie vir my drukkie!
Ons het ook nou die toeters geluister en vuurwerke gesien van ons vriende se balkon af … maar tog, as mens ouer word, dan wag jy die nuwe jaar so half met ‘n traan in die oog in … mis en verlang mense wat nie meer saam met ons is nie.
Maar waarvoor kan mens hoop … op ‘n beter jaar met goeie gesondheid, meer lag, minder trane en om meer goedheid in mekaar te sien (en in onsself)!
Ek hoop om in 2022 nog baie wyshede op jou blog te lees … meeste van die tyd, laat jy ‘n glimlag op my gesig 💌.
Van harte hoop ek saam met jou, Corna. 2021 het vir my jou as ‘n gawe nuwe blogvriendin gebring.
❤️
Ek is so dankbaar dat Kameel jou gebel het. Daar sal altyd iemand na jou toe gestuur word as ń lafenis, Frannie, ons Vader sien elkeen raak.❤
Jy weet wat jy as Gestuurde hierdie jaar vir my beteken het, liewe Una!
Hierdie jaar gaan ons weer sulke lekker kuiers inwerk, Frannie.🤗
Dankie Kameel dat jy gebel het . Frannie, ek hoop dis vir jou ‘n ligter jaar en dat jy altyd weet hoe diep jy in ons harte is. Dis ‘n tyd van die jaar, hierdie laaste 7 dae wat my altyd baie diep laat dink, wonder, bewe, lag, onthou, wens…baie emosies. Aan die einde sê ek net dankie. Ek hoop jou dag en jaar is besonders🌻🌻
Baie dankie liewe VirgoC 💖
💜
Liefste Frannie, mag 2022 vir jou goed wees. Mag jy Gid se liefde ervaar.
Dankie liewe Toortsie.
Ek het wakker gebly tot half 1 terwyl die res van my huis gaan slaap het. Solank die klappers geskiet het en die oorlog buite aan die gang was my honde rustig gehou. Een aand in ‘n jaar. ❤️
Om met jou te gesels het my dag ook verryk Frannie. Stywe drukkie van Kameel aan Frannie met haar mooi glimlag.
Aa, Kameel, jy het my gister diep laat dink – innig dankie daarvoor.
Dat Kameel toe die befoeterdheid se rug kom breek hrt! Mooi skoot!
Baie skerp, Letty-Ann!
;-D
Ek was gewoond aan vuurwerke voor die hotel op Waenhuiskrans. Gisteraand het ons langs die Weskus gesit, net die 7 familielede. Ons, die sterre, die sagte geklots van die see, die stilte, die reuk van vuurmaak. Salig, onvervangbaar mooi.
Dit klink wonderlik.
Dink aan jou Frannie! Mag 2022 nuwe vreugde bring!
Dankie, Aletta, ek glo dit sal.
😊💕
Ek was wakker tot 3uur…en het vir die eerste keer in n lang tyd gesmag na daai oujaarsdiens van 11uur in die aand. Het onthou hoe blasé ek daaroor geraak het maar skielik wou ek kaalvoet in die donker loop en n kerk gaan soek het…..is so bly jy het iemand gehad wat jou in die nuwe jaar in gesels het….jy is uiters geseënd. Bly so kosbaar…ons het jou nodig.