Die Goue Vroue is ‘n handjievol Suid-Afrikaanse vroue – oud en jonk – wat lief is vir skryf. Ons is geanker in die werklikheid, maar spoor mekaar met bloguitdagings aan om te fantaseer. “The Talking Stick” dien in hierdie geval as inspirasie tot wonderbaarlike stories…elke Goue Vrou kry haar beurt. Hierdie rondte pak ons in alfabetiese volgorde aan.
Dit werk so: as jy die praatstok vashou is dit jóú beurt! Jy praat en die ander moet luister sonder om jou in die rede te val. As jy klaar is met jou storie, gee jy die praatstok vir die volgende persoon aan. (Hierdie konsep is deur Stephen en Franklin Covey in hulle kursusse tot meer effektiwiteit benut om empatieke luister te bevorder).
Volg hierdie skakel as jy ons Goue Vroue se stories in volgorde wil lees:
https://fresh.inlinkz.com/party/fe16b378ba494670a41c59177986b352
Die praatstok het hier by my beland…
…en nou pik-pik my gedagtes soos verkeerdeveer-hoendertjies wat skrop op soek na iets lekkers.
Ek wou oor Afrikaans gepraat het, vertel het hoe ons besig is om ons kosbare erfenis te verloor – maar ag, dis laat in die aand en dis winter en ek het nie nou die krag vir so ‘n ernstige betoog nie.
Toe gaan slaap ek en nou is dit oggend. Soos gewoonlik dink ek aan my liewe dogter daar ver in Amerika se gebed saam met die seuntjies wat sy en haar man versorg by hulle “student home”: “Heavenly Father, thank you for adding another day to our lives!”
Maar inspirasie bly uit…
Volgens my ou HAT beteken “praat”: 1. Jou gedagtes hardop uitspreek; 2. Gesels; 3. Deur woorde iemand, iets in ‘n bepaalde toestand bring.
“gesels” omskryf die woordeboekmakers soos volg: 1. ‘n Gesprek voer, informeel met mekaar praat; 2. ‘n Bespreking hê; 3. Praat by wyse van ‘n teregwysing.
Ek is deel van twee groepe op fb wat oor Afrikaans praat – het g’n benul hoe ek daar beland het nie, is mos tegnologies gestremd – maar ek lees ewe gelukkig en gesels (praat?) soms saam. Onlangs vertaal iemand “I like to talk to you” – moes eintlik “I like talking to you” wees, maar toemaar, Ingels is geduldig – met “Ek hou daarvan om met jou te praat”. Ek stel toe ‘n ander moontlikheid voor: “Ek gesels graag met jou” en word heeltemal uitgeboul deur haar antwoord dat dit te formeel is. Kom toe agter dis omdat ek HAT se betekenis 1 aan “gesels” heg, maar die skrywer op fb dink eerstens aan betekenis 2. Soveel kans op misverstand, selfs onder mense met dieselfde belangstelling…
Hoe ek ook al probeer, dis moeilik om my gemoed so sonnig te kry soos die lieflike wintersdae hier buite. Die een na die ander stuk slegte nuus tref my hart en ek huil namens die mense wat verlies ervaar. Skryf (in hierdie geval praat met die stok in die hand) is veronderstel om terapeuties te wees, maar vanoggend het ek (goddank) ‘n ander terapeut: ‘n klein seuntjie met blink bruin ogies wat vir my kom vertel van sy rekenaar en my uitnooi om te gaan kyk.
Dankie, hemelse Vader, dat U dit goed gedink het om nog ‘n dag by my lewe te voeg.
Trommeltjies, dis nou jou beurt.
seegogga said:
Liewe Frannie, drukkies vir jou. Met so n terapeut, gaan jy hopelik gou weer borrel.
Tannie Frannie said:
Moenie vergeet van die terapeutiese waarde van die Goue Vroue nie!
woordnoot said:
Beste terapie ter wêreld….ons klein mensies wat ons lewens so verryk. Hoop jy sien aanstons weer die goue rand om die wolke. Ek verstaan jou gevoel. Ons is so vasgevang in skemerte. Dis nie heeltemal donker nie, maar ook nie heeltemal lig nie. Wêreld van skemer…….
Tannie Frannie said:
Intussen het julle klompie die son weer vir my laat skyn!
woordnoot said:
Goue sonskyn vroue……
Letty-Ann said:
Frannie, ek tel jou hartseer tussen die lyne op en hou van die gebed wat dankie sê vir ‘n nuwe dag. Geniet jou familie en wees lief.
Tannie Frannie said:
Dankie, letty-Ann, ek maak so.
wetanddustyroads said:
En dis soms al wat nodig is om te se … “dankie Here vir nog ‘n dag” ☺️.
Tannie Frannie said:
Hoe waardeer ek jou kommentaar!
wetanddustyroads said:
💌
Toortsie said:
Ai ou liefste Frannie, ek is so jammer dat jy soveel hartseer moet verduur. Ek wens ek jan jou ‘n drukkie gee.
En tong in die kies, jammer dat my draaitjie loop voor jy aan die beurt kom, soveel woelinge op Rebusfontein veroorsaak. Ek sal nou stil sit, ek belowe.
Tannie Frannie said:
Nee, moenie! Sonder jou woeligheid sal Rebusfontein en sy inwoners mos nie kan klaarkom nie!
Toortsie said:
Ek is bevrees dat jy heeltemal reg is! 😝
VirgoC said:
Frannie, ek hoop jou binnekant raak vinnig weer vol sonskyn. Ek is baie bly daai klein mannetjie is daar by jou. Stuur groot druk🤗🤗🌻🌻
Tannie Frannie said:
Baie dankie, liewe vriendin.
appeltjie said:
Ek hou van die uitdrukking “ek gesels graag met jou”. Dit klink meer aanvaarbaar vir my
Tannie Frannie said:
Dankie! Nou voel ek sommer beter.
Una said:
Ai Frannie, mens hoor die hartseer in jou skrywe raak. En ek kan dink jy verlang ontsettend baie na jou dogter en haar ‘gesinnetjie’ daar ver. Ons is almal baie lief vir jou.
trommeltjies said:
Hierdie is voorwaar hartseertye in ons lewens, daar is soveel verlange. Soms wonder ek of ek my kinders in Kanada ooit weer gaan sien en dan is my gemoed oorvol. Ek hoor jou verlang. Ons wil almal so graag blye tydings hoor, sterkte Frannie.
Tannie Frannie said:
Ai, ek onthou jou vertellings toe jy daar by hulle gekuier het.