Joshua (5 jaar oud) speel graag hy’s ‘n hondjie. Dan spring hy van buite teen ouma se deur op, druk die handvatsel af en stoot die deur oop. Handeviervoet kom hy die kamer binne en waai sy stert. Soms is hy ‘n reeds bekende hond, maar meestal is dit ‘n nuwe hond wat nou weer in ouma se kamer beland het. Dan moet hy ‘n plastiekbakkie vars water kry. As ouma (soos gewoonlik) voor die rekenaar sit en ietwat onwillig lyk, verander die hond ‘n rukkie lank in Joshua, totdat hy die bakkie met water vir die hond neergesit het. Dan drink die hond lekker water en spring op die bed om ‘n bietjie te kuier.
In die amper vyf maande wat ouma weer tuis is, was daar al ‘n hele paar honde met ‘n hele paar name, bv. Wagter, Flaffie, Perske, Piesang en Kersie (‘n ou hondjie wat stadig beweeg). Vandag, toe ouma se voorstel van “Vlekkie” nie byval vind nie, het sy ten einde raad die naam “Vrugtesap” vir ‘n nuwe hond voorgestel.
Joshua, kopskuddend:
“’n Hondjie wat se naam is ‘Vrugtesap’ – daai puppies don’t exist.”
appeltjie said:
Hulle is op die oulike stadium waar verbeelding n werklikheid is . Dis n lieflike vertelling .
perdebytjie said:
Dis so oulik, Frannie! Ek geniet kinders se verbeeldingspeletjies. Joshua is te dierbaar.
Bondelsgedagtes said:
Die wonder wêreld van ‘n kind❤️
vuurklip said:
Hy’s reg. Daai puppie’s don’t exist. Maar ek ken wel ‘n cartoon hond met kolle en sy naam is “Stripe”. Go figger.
Tannie Frannie said:
Ek figger en ek laaik!
vuurklip said:
Daai afkappingsteken by puppies is natuurlik ‘n fout. ‘n Growwe fout! ‘Skies.
Tannie Frannie said:
Uit selfverdediging steur ek my nie aan sulke foute nie.
wetanddustyroads said:
Klein Joshua laat my nou so aan myself dink (toe ek klein was) … ek wou so graag ‘n hondjie he, maar my ouers het toe pas ‘n tranedal opgevee nadat ons vorige hond die ewigheid in is en het gese ons moet eers bietjie wag. Toe kry ek vir myself ‘n “imagine” hondjie … en ek en Wagter was vir jare lank groot (‘imagine’) maats. Die verbeelding van ‘n kind is ‘n wonderlike ding – en klink my Joshua het geen tekort hieraan nie 😊.
scrapydo2.wordpress.com said:
Ja nee ouma hoe kan n hond nou so n naam kery. Hy is te dierbaar vir woorde. Dankie vir die deel.
Una said:
Is jy sowaar al 5 maande terug, Frannie! Hy is te pragtig, en met so ń wakker verbeelding gaan hy groot hoogtes bereik.🤗
Toortsie said:
Ag ouma, dis so kosbaar. ❤️
VirgoC said:
😄😄
sandreyerskryf.wordpress.com said:
Lekker bekkig hierdie kleinseun! 👏😄
seegogga said:
Due Josua klink na so n spesiale outjie. En sy beste speelmaat is sy ouma!