My dogter het twee tamatieplantjies sommer by Walmart gekoop, in twee groot potte oorgeplant en vertroetel. Die een is ‘n “beef steak tomato”, die ander een klein kersietamatietjies. Onder haar liefderike sorg blom die plante letterlik en figuurlik, ons gaan een van die dae begin oes.

 My skoonseun en ek verjaar op dieselfde dag. Hulle nooi ‘n paar vriende oor en “grill” op die Amerikaanse manier. Daar is ballonne en feestelike papierritse. Ons kry elkeen ‘n koek (sjokolade en grondboontjiebottervulsel vir Paul; vanielje met soutkaramelversiersel en dolce delizio-vulsel vir my) en daar word twee keer “Happy Birthday” gesing.

Ek sit op die houtstoep en kyk uit oor die groen panorama, hou die maan dop soos wat dit stadig aan die suidekant deur die lug oor die boomtoppe beweeg. Dis nogal ‘n mylpalerige verjaarsdag, ek het soms, destyds in Suid-Afrika soos wat die D-dag stadigaan nadergeskuif het, vaagweg gedink ek sou die een of ander vierinkie moes reël, maar hóé of wát, dit was die vraag…

En kyk nou net: ‘n heerlike somersverjaarsdag vir hierdie suidelike wintersbaba!

Ek en daardie tamatieplante is ewe gelukkig…