Liewe kraletjieshoep-hoep, het jy ooit kon droom dat jy in die verre VSA sou beland, onder vreemde sterre en ‘n maan en son wat verkeerd hang?

Ek onthou die dag toe ek by die skrikwekkende kruising van Lynwoodweg en Solomon Mahlangu van die pad af getrek het, met my hart in my keel, om jou te koop sodat ek jou vir my dogter kon saambring hierheen. Ek moes jou draadpootjies van die lang, stewige bloudraadpen af losdraai, want daar was nie plek in die tas daarvoor nie. Nou sit jy maar so op die grond in die sitronellaplant se pot.

Hoe wens ek die een wat jou so kunstig aanmekaargeweef het kon weet waar een van sy sjarmante skeppings nou is.

Sê my, hoep-hoepie, verlang jy?