le-jou-eier1-e1512926357627

Onthou julle nog Kim Kardashian se tolk? Die jongeling wat besluit het hy gaan terug na sy oupa en ouma se Bosveldplaas? Sy naam is Jakobus en sy ma is ‘n dinamiese antiekhandelaar in Johannesburg. Jakobus het haar vertel van die antieke koekstaander op my stoep en sy is baie opgewonde – skynbaar is dit besonderse Africana waarvoor die regte versamelaar baie sal betaal, dalk sommer nog met ongeslypte diamante! Silver het onderneem om die transaksie te gaan beklink – hy is netnou hier weg op sy Harley, met die koekstaander veilig in een van die sy-tasse weggepak. Hopelik kry ons ‘n ou ietsie om ons deur te sien totdat daar tyd is om die herehuis behoorlik vir skatte te fynkam.

Hoop julle geniet die croissants wat Lorenzo vir ons gebak het (ja, ek weet – hoeveel talente gaan ons nog ontdek??), Toortsie se heerlike neutemuffins en die baksel wortelmuffins wat ek gepleeg het deur Toortsie se resep noukeurig te volg. Daar is botter, gerasperde kaas en appelliefiekonfyt. Julle moet lekker eet – die arbeider is haar loon werd! Intussen gaan ek die slimme Vuurvliegie se wenk opvolg en daarbinne na ‘n eksemplaar van “Far from the Madding Crowd” soek – wie weet wat ons daarin mag ontdek!

Kyk julle, kyk! (Atiesjoe, atiesjoe, kug, kug, hagahagahaga…og, daardie ellendige stof!) Daardie einste boek het sommer reg onder my neus gelê, amper asof ek dit móés raaksien. ‘n Verbleikte pienk briefie, nog in sy koevertjie, sonder adres en met ‘n ongestempelde seël – dis nooit gepos nie! Wag, kom ek lees dit vir ons:

Pappa,

Ek is so ongelukkig! Wanneer kom jy huis toe? Mamma dwaal in die tuin rond, sy steur haar nie aan haar kinders nie – nie aan my of selfs aan Thomas nie. Tannie Isabella het gesê sy gaan my nie meer klavierles gee nie, want ek oefen nie hard genoeg nie. Mnr Hardy raak al hoe kwaaier – Pappa, mens is tog nie veronderstel om bang te wees vir jou butler nie?

Die dag nadat jy weg is, het oom Leonard ook vertrek. Hy het gesê hy kan my niks meer van waterverf leer nie, dat ek nou ‘n meesteres-skilder is! Ek mis hom ook, maar nie halfpad soveel soos vir jou nie. Waaroor het jy en mamma so baklei voor jy hier weg is? Sy het daardie hele nag gehuil…

Volgende week word ek sestien – ag Pappa, kom huis toe vir my verjaarsdag, toe, asseblieftoggie? Ek het mev. Marks baie mooi gesoebat en sy het uiteindelik ingewillig om vir my ‘n spesiale koek te bak, met pienk versiersel en ‘n string klein versiersuikerrosies. Pappa, as jy net hier kan wees, met jou arm om mamma se middel en jou ander arm om Thomas se ou smal skouertjies. Jy sal vir ons glimlag en in jou donkerbruin oë sal ons jou liefde vir ons kan sien. Eden sal weer ons huis wees, met musiek en vrolike stemme…en Mamma sal weer lag en sing…

Ek het nou net besef ek het geen idee waar jy is nie, geen adres waarheen ek hierdie brief kan stuur nie. Ag, Pappa!

Klara

Frannie kyk op en haar oë is vol trane, veroorsaak deur die ou traanklatte hier en daar op die tragiese ou briefie. “Julle, ek het nog ‘n boekie ontdek – ‘n dagboek. Dis gesluit en op die omslag staan: ‘Charlotte se dagboek’.  Ek dink dis die naam van Klara se ma – ek dink dis die vrou wat die brief aan Leonard geskryf het. Vuurvliegie, ek gee hierdie dagboek veilig in jou hande oor – ek weet jy sal die misterie verder vir ons ontrafel.”

Ons InLinkz skakel vir hierdie uitdaging is https://fresh.inlinkz.com/p/3f26291088494dc99c7aa4554a66a313

Bloggers wat nog nie voorheen deelgeneem het aan ons Lê-Jou-Eier bloguitdagings nie: Om raad te kry oor hoe om deel te neem en om elke week se aankondiging van die nuwe onderwerp te sien, besoek die volgende skakels Lê-Jou-Eier: Reëls en Lê-Jou-Eier: Hoe neem ek deel? Laasgenoemde blogpos bevat ook al die onderwerpe en skakels na vorige uitdagings.