Vanmiddag kon ek, net soos verlede jaar, gaan luister na ‘n lieflike opname van Handel se Messias.

Ons sit in die mediasentrum van ‘n woonplek vir “selfversorgende bejaardes”, so ‘n stuk of tien vrouens en twee mans. Elkeen het ‘n handgeskrewe libretto van die betrokke Bybelgedeeltes in Afrikaans, sodat ons presies kan volg en verstaan waaroor die musiek gaan: dele uit Jesaja, die Psalms, die Evangelies, ‘n stuk uit Openbaring. Die teks deur librettoskrywer Charles Jennens het Handel so begeester dat hy sy monumentale werk binne die bestek van drie tot vier weke in Augustus/September 1741 in ‘n verstommende kreatiewe uitbarsting gekomponeer het.

Die werk bestaan uit drie dele: I Die geboorte van Christus, II Sy lyding en sterwe, III Die opstanding. Koning George die Tweede het met ‘n uitvoering van die Messias tydens die Hallelujakoor opgestaan. Protokol het vereis dat almal in die koning se teenwoordigheid ook dan moes staan, wat gelei het tot die tradisie om tydens die Hallelujakoor te staan, wat vandag nog gehandhaaf word. Vanmiddag het ons handjievol mense ook gestaan, in erkentlike ootmoed voor ons Heer en Verlosser…

Die dryfveer agter hierdie jaarlikse geleentheid is ‘n besonderse vrou – die een wat die libretto vir ons uitgeskryf en gefotostateer het. Haar blymoedigheid gee my sommer moed vir die ouderdom!

Dis nie asof sy geen droefheid en smart deurgemaak het nie: sy is lank reeds weduwee en meer onlangs moes sy binne die bestek van ‘n paar jaar ‘n skoonseun, ‘n kleinseun en ‘n dogter aan die dood afstaan.

Wat is haar geheim? Benewens haar geloof, dink ek dis haar gawe om uit te reik en vir ander om te gee. Sy maak nie haar woonstel se deur toe en luister in afsondering na die goddelike musiek nie. Nee – sy sit vir ons ‘n musikale fees voor en sy sorg selfs vir die lekkerbekke: vrugtekoek, ‘n gemmerbroodjie, paaseiers, gemmerbier, vrugtesap…