‘n Lieflike koel vroegherfsoggend, na goeie reën oor die naweek.

Vanoggend takel ouma, met swartsak en geel handskoene, daardie ellendige gras wat so tussen die plaveisel se bakstene groei!

Joshi bommel maar heen en weer: speel met die hond en trek haar maaghare (dankietog sy’s so geduldig!); ry op sy blou plastiekfietsie (totdat hy sy vingertjie met die stuurstang vasknyp); klim op die motorhek se masjienkas en roep om hulp om weer daar af te kom; verdwyn in die huis en raak onheilspellend stil…

So tussen die onderbrekings deur vorder ouma fluks, totdat die tweejarige besluit hierdie swartsak is ‘n al te lekker speelding. Nou maak hy dit vermakerig toe totdat ouma vra: “Maak oop die sak, Joshi?” Dan hou hy dit oop vir een uitgetrekte grassietjie; maak weer die sak toe; wag vir ouma se volgende pleitslag. Uiteindelik hol hy weg, sak en al.

Ouma het seker so vyf bakstene se onkruid uitgetrek gekry…

Maar dis ‘n lieflike koel herfsoggend in Pretoria.

 

Advertisements