Klein Gabby word vandeesweek vier jaartjies oud en ons het Saterdag partytjie gehou.
Skoolmaatjies, niggie en nefies het kom saambaljaar en eet; onder die berg geskenke ingevaar en chaos geskep soos wat net klein kindertjies kan.
Die oumas en oupas het in die koel lapa met sy Bosveldse grasdakgeur teen die hitte geskuil en die jong ouers het die son buite trotseer.
Dit was ‘n wonderlike dag.
Sondagoggend vroeg bring Gabby vir my ‘n plakkertjie uit een van haar presentboeke met ‘n groen sterretjie (groen, want sy weet dis my gunstelingkleur). Toe ouma vra hoekom sy ‘n sterretjie kry, hoor sy die volgende getuigskrif:
Want jy pas jou kamer op en jy kam jou hare en jy borsel jou tande en jy slaap soet.
Ouma het inderdaad Saterdagnag soet geslaap – sy was vodde.
Tannie Frannie 
Kostelik,Frannie! Ai mens kan nie glo ons ou kleintjies is al vier nie!Ek sal binnekort dalk ietsie van my outjie plaas.
Toe ek na my mislukte kiekies van die partytjie kyk, het ek aan jou wonderlike foto’s van daardie blou-oogseuntjie gedink.
Ek is seker jou foto’s het nie misluk nie!😄
Baie geluk met die kleintjie se verjaardag en ouma se groen sterretjie ook, ek is seker sy verdien dit.
Ag, hoe dierbaar!
Ouma, jy verdien die stêrretjie! Ek sit heerlik en lag vir die lysie goed wat jy so mooi regdoen.xxx
Mens moet so dingetjie opvreet van liefde
Baie geluk met jou prys, Ouma Frannie!
Kan jy nou meer, al vier jaar! Amper oppad groot skool toe. Jy verdien n sterretjie Ouma. Dit word fyn dopgehou. So bly jy geniet die kuiertjie en samesyn.
Veelsgeluk ouma met jou sterretjie!!! Mag die klein juffroutjie ‘n lekker jaar hê, en vir nog baie vreugde sorg.