Gistermiddag skraap ek al my moed bymekaar en ry in die rasende middagverkeer na die winkelsentrumpie toe waar die ou so op my geswets het. Daar’s ʼn groentewinkel daar – raserig, beknop en nou nie wat mens sou kon noem silwerskoon nie, maar met vars groente en vrugte in oorvloed.

Daar maak ek ʼn wonderlike ontdekking: wit kaalperskes!

Joshi het vandag sy eerste verjaarsdag gevier. Hy sit op my heup terwyl ek een van die sappige perskes in skyfies sny en klein-klein stukkies vir hom voer terwyl ek self lekker weglê. Nou en dan hou ek ʼn heel skyfie vir hom sodat hy met sy agt tande daarin kan byt.

Die geur van die perske beweeg met my kiewe langs tot in my neusholtes – dis ʼn heerlikheid wat mens eintlik nie kan beskryf nie. Ouma en kleinseun raak al hoe taaier…

Hoe geseënd is hierdie ouma tog!

x

Advertisements