Sleutelwoorde
Vir die tweede keer het die uwe ingeskryf vir WordPress se inleidende blogkursus (die vorige poging het nie enduit gehou nie) – vandaar hierdie stukkie, want as eerste opdrag wil hulle hê mens moet oor jouself skryf.
Iemand by die werk het my “Tannie Frannie” begin noem (die “Frannie” rym met “Tannie”) en ofskoon ek aanvanklik skuins opgekyk het oor die ouderdomskonnotasie wat daar iewers geskuil het, het ek besef dat dit ʼn spesiale blykie van toegeneentheid was. Toe ek in Augustus 2011 by Litnet begin blog het, het ek doelbewus hierdie skuilnaam gekies om vrede te maak met die feit dat ek reeds wel deeglik ʼn “tannie” was.
Daar by Litnet het ek heerlik in Afrikaans geblog en blogvriende gemaak wat ek nou nog mis. Ongelukkig was daar ʼn gebrek aan tegniese ondersteuning, wat daartoe gelei het dat ʼn klompie bloggers in Mei 2014 besluit het om uit die visdam van Litnet in die grote oseaan van WordPress in te spring. Ek was nog nooit spyt dat ek deel van daardie migrasie was nie. WordPress se tegniese ondersteuning is verstommend effektief: die “happiness engineers” (watter wonderlike titel) reageer onmiddellik op die simpelste vrae, met duidelike aanwysings en sonder om ʼn BBT (“Born Before Technology”) dom te laat voel. Die reeks kursusse waarvoor mens slegs met die klik van ʼn knoppie kan inskryf, dek die meeste vrae en is uiters leersaam. Ek hou veral van die demokratiese opset (hulle noem bv. Afrikaans as een van die tale wat hulle ondersteun) en die goeie blog-etiket wat deurgaans bevorder word.
Die rustige strepieskat van my avatar was op ʼn verjaarsdagkaartjie, jare gelede van my dierbare dogter af. Die kaartjie het my ingelig dat ek, in my stryd teen die ouderdom, besig was om goed te vaar: “You’re holding up well”. Van al die kat-kaartjies wat sy my al gegee het (omdat sy weet dis haar ma se gunstelingdier), het hierdie een my hartsnare die diepste geraak.
Skryf is vir my terapie: as ek my oor iets bekommer, of hartseer is, of vies, of woedend, of as iets so mooi is dat ek wil huil, dan skryf ek. Soos wat my kleinseuntjie se lyfie verslap as hy sy fopspeen suig, so ontspan my gemoed as ek skryf.
Afrikaans is my moedertaal, die taal waarin ek sing, droom en aanbid. Jare lank moes ek my brood en botter met behulp van Engels verdien, maar nou is my tyd my eie en so ook my taal.
WordPress beklemtoon dat die blogs wat ʼn mens volg en die kommentaar wat jy gee en ontvang, ʼn hoogs belangrike deel van die blogervaring is en daarmee stem ek van harte saam. Dankie aan elkeen van julle wat hier lees en gesels, julle verbreed my horisonne, verras, vermaak en verstom my elke dag!
Ek onthou die groot trek!Sommige van ons het verlore geraak,maar ek is bly jy is een van hulle wat hier beland het.Die blogwereld is voorwaar ‘n heerlike plek!
Schöner Beitrag lieber Gruß und einen schönen Tag Gislinde
Dankie vir ‘n baie mooi skrywe, en dankie ook dat jy by ons lees! Die gevoel is dieselfde, dis lekker, dis opbouend.
Aangename kennis, dis lekker om jou (weer) te ontmoet 😀 Ek geniet jou skrywes.
Altyd ‘n fees om jou blogs te lees.
Ek is een van jou grootste fan’s
Aangename kennis Tannie Frannie. Ek het hier by woordstoot begin, toe migreer na Litnet na dinge hier in die Afrikaanse gemeenskappie effe uitgerafel het, en toe weer teruggetrek toe Litnet onklaar geraak het. Ek het onlangs ‘n advertensie gesien van ‘n visserman wat sê: alles wat ek weet, het ek in Afrikaans geleer. Dit is vir my so mooi. Ek doen ook besigheid in die Rooitaal, en deesdae open ek my opleiding met die waarskuwing dat ek net genoeg Engelse woorde per dag het om te hou tot oggendtee. Dit kry gewoonlik ‘n glimlag uit die teenwoordiges en as ek dan inderdaad oor die Engels begin struikel vergewe hulle makliker.
Ek waarsku hulle ook voor die tyd dat ek engels slegs uit selfverdediging praat.
Bly jy het na wordpress migreer. Ek vind die lesers almal baie positief, opbouend en hoflik.
Ek het hierdie stuk met plesier gelees, asook dat dit mooi herrineringe ontwaak het. Ek onthou dat ek af en toe ‘n oortreder in Litnet geword het, maar in daardie geval was die feit dat ek as oortreder gevolg geword het vir my lekker gewees!
Ek onthou nou dat jou meerkat so af en toe ook op Litnet opgeduik het!
Taamlik dikwels!
Aangename kennis! Ek het jou by Litnet ontmoet en toe weer hier op WP. Dis goed om die uitdagings van hul hier te doen. Ek self almal n tweede keer gedoen. Dit gee mens lekker meer vaardighede om mee te speel. So bly jy kan nou Afrikaans uitleef in woord en daad. Ek sien uit na jou vertellings verder(en jou verbeteringe wat jy gaan uitvoer!)
Aangename kennis!! Pragtige geskryf!
Ek GENIET jou skryfsels!!
Ja, en was ons vies vir LitNet. Lees ´n rukkie terug ´n ou blog daar en toe besef ek weer hoe lekker dit eens daar was en wonder wat het van die bekendes geword, wat gereeld kommentaar gelewer het. Besef toe dat dit aanstap na 10 jaar se bloggery vir my.
Laat weet ons asb as jy die dekademerk bereik, sodat ons jou blog kan vier!
(Ek kan nou nog nie glo hoe Litnet ons vertoë net eenvoudig geïgnoreer het nie.)
As ‘n pasgebore blogger wat baie wankelrige tre”e gee na die w^ereld waar tegnologiese geremdheid my telkens laat struikel, vind ek groot vreugde in die Afrikaanse inskrywings wat my rekenaarskerm kruis. Ek is minder opgewonde oor die “tannie”etiket want dit sou beteken dat ek my lewe met ‘n “oom” deel. Waar kry ‘n mens daardie broodnodige blog-hulp wat jou tot hierdie vrolike stukkie skryfwerk ge”inspireer het?
Dis so lekker om nog Afrikaanse blogs te ontdek! Daar is ‘n blog, “The Daily Post”. Bo-aan is verskillende opsies, waarvan een “Blogging University” is. As jy op daardie opsie klik, sien jy die verskillende kursusse en dis waar die knoppies is waarop jy net kan klik om in te skryf. Daarna stuur hulle vir jou e-posse met duidelike aanwysings, hulp en raad. Die volgende skakel behoort jou by die Daily Post uit te bring:
https://dailypost.wordpress.com/
Hoe vriendelik van jou! Baie dankie en lekker skryf.
Dis net ‘n plesier – ek sien uit daarna om by jou te lees.
Janee almal was hartseer oor die verlies van die blog gemeenskap. Hier is dit net lekkerder, sonder die onaangenaamheid van sekere mense 😀
Aangename kennis Tannie Frannie. Het op laerskool van die Groot Trek geleer en dit is vir my ‘n voorreg en ‘n eer om die skrywes te lees van iemand wat dit meegemaak het!!
😀 😥
Ek moet sê… ek sukkel om Afrikaans te lees… maar, in die laaste paar maande het Hester en haar pelle gesorg dat ek hartelik geamuseerd bly!
Ek geniet jou interaksie en sal probeer om so dikwils as moontlik hier ‘n draai kom gooi!
Dankie!! 😉
Vir my is jou vertellinge en foto’s van Ierland ekstra spesiaal omdat ek op dié manier ‘n beeld kry van my seun en sy gesin se nuwe omgewing. Dis nou benewens die feit dat jy in elk geval ‘n interessante blogger is!