Teen my kamermuur hang ʼn pragtige geraamde legkaart – ʼn fantasiefiguur van ʼn vlindervrou met wilde blonde hare en pouvere, omring deur blomme, voëltjies en feë, in die pragtigste ryk, gedempte kleure met ʼn metaalglans. In die een hoek is daar ʼn silwerblou en pers see met seilskepe onder ʼn sekelmaan, en die water wat die see vorm, drup uit ʼn pragtige skulp. Daardie stukkie van die legkaart, waarop die druppende water afgebeeld is, kon ons eers heel laaste ingepas kry, want ek en my dogter het die stukkie heeltyd dwars laat lê in plaas van vertikaal, met die gevolg dat ons nie besef het die strepies is druppende water nie.
My kind het by ʼn boekwinkel gewerk toe sy hierdie legkaart gekoop het, in die tyd voordat sy oorsee is om by Disneyworld te gaan werk. Toe ons dit klaar gebou gehad het, het sy dit laat raam en nou is dit ʼn kosbare herinnering aan gelukkige ure wat ons saam kon deurbring.
Ek kyk dikwels na daardie laaste stukkie en wonder wanneer en hoe ek die laaste stukkie van my lewenslegkaart ingepas gaan kry… Is daar iets wat ek strykdeur verkeerd-om laat lê? Om ure lank aan ʼn legkaart te bou en dan agter te kom dat ʼn paar van die stukkies weg is, is ʼn groot teleurstelling. Hoe nou gemaak met verlore stukke en die lelike gate wat dit in my lewe laat?
Te midde van my wroeging eggo die woorde: “Kyk, Ek maak alles nuut.” (Openbaring 21:5)
ekmyselff said:
Nou laat jy my ook wonder… maar ons moet leef
Tannie Frannie said:
Dis waar, ja – jy inspireer my om my bes te doen met die stukkies wat nog oor is.
HesterLeyNel said:
Ek dink ‘n mens moet die verlore gate maar beskou as wonde wat opgedoen is in die harde stryd om oorlewing. Perfeksie is nie altyd nodig vir ‘n mooi prentjie nie – die gate gee karakter. Dit was ‘n goeie vergelyking wat jy hier getref het.
Tannie Frannie said:
Dankie vir jou troosvolle woorde.
rondomtaliedraai said:
Aha Josephine Wall – ‘n gunsteling!
Ek moet my ook kort-kort aan die woorde herinner, want ek kan my so jammer kry… .
Tannie Frannie said:
Dankie, dankie!! Ek het haar naam vergeet… Dit nadat ek en my dogter ‘n hele paar van haar pragtige legkaarte gebou het!
rondomtaliedraai said:
Ek moes ook eers soek Ek het van haar webwerf altyd eposse gekry Ek hou van die detail van haar skulderye. Mens kry ook kaartjies daarvan
Tannie Frannie said:
Sal haar webwerf gaan opsoek, sy skilder die mooiste goed!
rondomtaliedraai said:
Ja Ek het op ‘n stadium prente van haar goed bymekaar gemaak en is besig met ‘n klein lintborduurstukkie van haar
Kameel said:
Mooi geskryf Frannie. Ja, ‘n mens kyk oor jou lewe terug en op baie plekke maak die legkaart net nie sin nie, of stukke is weg. Maar dan weer “the Lord makes everything beautiful in His time.”
Tannie Frannie said:
Amen!
coetzee2014 said:
´n Groot lekkerte, die bou van legkaarte, maar dit is deesdae, hier in ons wêreld, ´n groot gesukkel om een in die hande te kry, wat die moeite werd is.
Tannie Frannie said:
Dis asof die aanlyn-inkopies oorgeneem het. Toe ek by my dogter in die VSA gekuier het, het sy een-twee-drie vir ons ‘n nuwe legkaart aanlyn bestel. Ek sukkel nog om my kop om daardie manier van koop te kry…
coetzee2014 said:
Ek sukkel ook daarmee, nog nooit so gekoop nie. Sien nie kans om my kredietkaart besonderhede so bekend te maak nie.
scrapydo2.wordpress.com said:
Die lewenslegkaart en sy verlore stukkies is n baie mooi vergelyking. Eintlik moet mens ook die stukkies wat weg is sien asof dit deeltjies is wat nie daar moes wees nie. Dit maak wel n kaal kol maar is moontlik ten goede. Daardie stukkie kan of kon dalk n groot gat veroorsaak maar die ander stukkies hou die kaart tog stewig aan mekaar vas. Baie mooi geskryf en baie dankie vir die deelname. Noudat ek jul stukkies lees besef ek hoe nbelangrike onderwerp dit was.
Tannie Frannie said:
Dankie, liewe Scrapydo, dat jy my herinner aan die kosbare ander stukkies wat keer dat alles uitmekaarval.
scrapydo2.wordpress.com said:
Dit is tog hoe dit rerig werk. Jy kannie bestaan sonder die groter prentjie rondom jou nie. Die lewe is maar rof met tye.
Toortsie said:
Ja, ek maak ook maar blertse op my lewenslegkaart.
Tannie Frannie said:
Julle blogvriende se kommentaar hier is absoluut kosbaar!
Terug pieng: Toeka-Tokkel no 16: Speletjies/speel/spel – I scrap 2
Olga said:
Groot frustrasie as mens daardie legkaartstukke so sorgvuldig bewaar het en dan op die pylvlak agterkom maak nie saak hoe goed jy gekyk het nie, daar is ‘n stuk of drie weg. Dan wonder ek altyd, hoeveel moeite kon dit gewees het om, op die dag van aankope daardie stukkies te getel het om seker te maak daar was 5 000 stukkies in daardie stel.
Tannie Frannie said:
Og nee, heeltemal te veel moeite vir my!
Olga said:
Seg ek ook.